Sulmuesi i Tenerife-s, Jesús de Miguel, ka ndërruar jetë në moshën 30-vjeçare, pasi u përplas me portierin e Andorrës, Jesús Owono, gjatë një ndeshjeje në divizionin e dytë të futbollit spanjoll.
Klubi Tenerife njoftoi se futbollisti ndërroi jetë të martën, më 3 nëntor 2026, në orën 08:00 të mëngjesit, pasi gjendja e tij shëndetësore ishte përkeqësuar gjatë natës. De Miguel ishte dërguar në kujdes intensiv të hënën pasdite, pasi pësoi arrest kardiorespirator dhe nuk arriti të rifitonte vetëdijen.
Incidenti ndodhi në fund të ndeshjes mes Tenerife-s dhe Andorrës, e cila ishte shtyrë me 24 orë për shkak të rrezikut nga reshjet e dendura në ishull.
Me rezultatin 2-2, në minutën e 96-të, një top i gjatë u largua nga zona e Tenerife-s. De Miguel e ndoqi atë në hapësirë, ndërsa portieri i Andorrës, Jesús Owono, doli larg portës dhe u përplas me sulmuesin pranë rrethit të mesit të fushës.
Owono u ndëshkua menjëherë me karton të kuq. De Miguel mbeti pa ndjenja në fushë, ndërsa lojtarët e të dyja skuadrave kërkuan ndërhyrjen e menjëhershme të stafit mjekësor. Gjyqtari Manuel Ángel Pérez Hernández e ndërpreu përfundimisht ndeshjen në minutën e 108-të.
Lexo gjithashtu
Mjekët arritën t’i rikthenin pulsin De Miguel-it në ambulancë dhe e transportuan drejt Spitalit Universitar Nuestra Señora de Candelaria, në Santa Cruz.
Sipas njoftimit të klubit, futbollisti arriti të merrte frymë pa ndihmë, por mbeti pa vetëdije dhe në gjendje kritike. Në orën 05:00 të mëngjesit, Tenerife njoftoi se gjendja e tij neurologjike ishte përkeqësuar. Tre orë më vonë, ai ndërroi jetë.
“CD Tenerife njofton ndarjen tragjike nga jeta të Jesús de Miguel Alameda, këtë të martë, më 3 nëntor 2026, në orën 08:00 të mëngjesit”, thuhej në deklaratën e klubit, të publikuar në orën 09:31.
Në reagim, klubi shprehu dhimbjen e thellë për humbjen e futbollistit dhe solidaritetin me familjen, të afërmit, shokët e ekipit dhe të gjithë ata që janë pjesë e Tenerife-s.
Ish-mbrojtësi i Barcelonës dhe aksioneri kryesor i Andorrës, Gerard Piqué, reagoi në rrjetet sociale me një mesazh ngushëllimi: “Më vjen shumë keq. Pusho në paqe, Jesús”. Edhe klubi i Andorrës shprehu ngushëllimet më të sinqerta për familjen e De Miguelit, shokët e tij të ekipit dhe Tenerife-n.
Homazhe për futbollistin kanë bërë edhe klube të tjera të futbollit spanjoll, mes tyre Barcelona dhe Real Madridi. “Mendimet dhe mbështetja jonë janë me familjen, miqtë dhe të dashurit e tij në këto momente të vështira”, thuhej në reagimin e Barcelonës. Ndërsa Real Madridi shprehu ngushëllime për familjen, shokët e ekipit, klubin dhe të afërmit e futbollistit.
De Miguel e kishte zhvilluar pjesën më të madhe të karrierës në kategorinë e tretë të futbollit spanjoll, ku kishte luajtur për Leganés B, Inter Madrid, Fuenlabrada, Navalcarnero, Unionistas de Salamanca dhe Castellón. Pas ngjitjes së Castellón-it në divizionin e dytë, në vitin 2024, ai ishte golashënuesi më i mirë i skuadrës. Në vitin 2025 iu bashkua Tenerife-s.
Në shenjë respekti për futbollistin, Federata Spanjolle e Futbollit njoftoi shtyrjen e të gjitha ndeshjeve të planifikuara për të martën në Kupën e Mbretit dhe Kupën e Mbretëreshës.
