Disa vatra zjarri janë aktivizuar në qarqet e Lezhës dhe Elbasanit, duke shkaktuar përhapjen e flakëve në sipërfaqe me ullishte, pemëtore dhe pyje. Era e fortë dhe terreni i vështirë po pengojnë ndërhyrjen e forcave zjarrfikëse, ndërsa rreziku për banesat mbetet shqetësues.
Një zjarr ka përfshirë një sipërfaqe në fshatin Piraj të Lezhës. Flakët, të favorizuara nga era, janë përhapur me shpejtësi duke iu afruar banesave dhe kishës së fshatit. Forcat zjarrfikëse dhe strukturat e tjera janë angazhuar në terren për neutralizimin e vatrës.
Ndërkohë, në fshatin Galush të bashkisë Peqin, zjarri ka përfshirë rreth 20 hektarë ullishte, pemëtore dhe shkurre. Për shuarjen e flakëve janë mobilizuar dhjetëra zjarrfikës dhe mjete nga Peqini dhe bashkitë përreth, si dhe dy helikopterë. Prioritet i ndërhyrjes është mbrojtja e banesave pranë zonës së përfshirë nga zjarri.
Një tjetër vatër vijon të jetë aktive prej rreth 48 orësh në masivin pyjor me pisha në Caush, në zonën e Shpatit, në bashkinë Elbasan. Flakët kanë përfshirë të paktën 5 dynymë pyll, në një lartësi mbi 1400 metra mbi nivelin e detit.
Dyshohet se zjarri në këtë zonë është shkaktuar nga goditja e rrufesë, ndërsa terreni i thepisur e ka bërë të pamundur ndërhyrjen me mjete zjarrfikëse.
Lexo gjithashtu
Situata vijon të monitorohet nga strukturat përgjegjëse, ndërsa përpjekjet në terren janë përqendruar në kufizimin e përhapjes së flakëve dhe mbrojtjen e zonave të banuara.
