Trupi i pajetë i Denaldo Maxhallakut, 31-vjeçarit shqiptar që ishte zhdukur pa lënë gjurmë që prej mbrëmjes së 7 tetorit, është identifikuar zyrtarisht pas zbulimit të tij në një pus në Longiano të Italisë.
Hetimet paraprake kanë ngritur dyshime të forta se shqiptari është vrarë me armë zjarri. Pranë vendit ku u gjet trupi janë zbuluar edhe gëzhoja pistolete, ndërsa ekspertiza mjeko-ligjore sugjeron se vdekja mund të ketë ndodhur që në natën e zhdukjes së tij.
Sipas rindërtimit paraprak të ngjarjes, 31-vjeçari, baba i një vajze vetëm një vjeçe, ishte larguar nga banesa për t’u takuar me një person të njohur në Savignano sul Rubicone. Ky takim po konsiderohet një element i rëndësishëm për hetuesit, të cilët po përpiqen të zbardhin orët e fundit të jetës së tij.
Dyshimet për një krim të rëndë u shtuan pasi, një ditë pas zhdukjes, automjeti i tij tip “Fiat Punto” u gjet i djegur plotësisht pranë lumit Rubicone. Hetuesit dyshojnë se djegia e makinës mund të ketë qenë një përpjekje për të zhdukur gjurmët dhe provat që mund të çonin te autorët.
Prokuroria e Forlì-t dhe karabinierët po vijojnë hetimet për të rindërtuar dinamikën e ngjarjes, për të identifikuar personin me të cilin Maxhallaku kishte lënë takimin dhe për të zbuluar motivet e mundshme të vrasjes.
Deri më tani, autoritetet po punojnë për të sqaruar të gjitha rrethanat e kësaj ngjarjeje të rëndë, ndërsa pista e vrasjes mbetet në qendër të hetimeve.
