Kongresisti republikan amerikan Joe Wilson i ka kërkuar sekretarit amerikan të Shtetit, Marco Rubio, vendosjen e sanksioneve ndaj katër biznesmenëve serbë, të cilët i cilëson si bashkëpunëtorë të afërt të ish-presidentit Aleksandar Vuçiç.
Sipas një letre të datës 14 tetor, të siguruar nga Radio Evropa e Lirë, në listën e personave ndaj të cilëve kërkohen masa janë Ivan Boshnjak dhe Stojan Vujko, nga kompania Millennium Team, Davor Macura, nga Alta Banka, si dhe Zhelko Mitroviq, pronar i televizionit Pink.
Wilson kërkon që këtyre personave t’u ndalohet hyrja në Shtetet e Bashkuara dhe përdorimi i sistemit financiar amerikan. Në letrën drejtuar Rubios, ai i akuzon biznesmenët për shfrytëzimin e burimeve publike për përfitime personale, mbështetjen e një regjimi të korruptuar dhe veprime që, sipas tij, dëmtojnë interesat amerikane në rajon. Ai gjithashtu pretendon se ata janë përfshirë në manipulimin e zgjedhjeve të 25 tetorit.
Nga ana tjetër, Millennium Team dhe Alta Banka i kanë hedhur poshtë akuzat në përgjigjet e tyre për Radion Evropa e Lirë, duke i cilësuar ato si të pavërteta. Ndërsa Zhelko Mitroviq nuk ka dhënë një përgjigje të drejtpërdrejtë ndaj pretendimeve.
