Kryeministri Edi Rama ka mbërritur mëngjesin e kësaj të hëne në Kryesinë e Kuvendit, ku po zhvillon mbledhjen e përjavshme me grupin parlamentar të Partisë Socialiste.
Sipas raportimeve, takimi po zhvillohet me dyer të mbyllura. Në fokus të diskutimeve pritet të jenë axhenda parlamentare për seancën e ardhshme plenare dhe nismat e reja ligjore të paralajmëruara nga kreu i qeverisë lidhur me protestat.
Sipas gazetares Shehu, Rama pritet t’u prezantojë deputetëve socialistë propozimet ligjore që lidhen me masat ndaj personave të përfshirë në akte dhune gjatë protestave.
Pas prezantimit, do të shihet nëse do të mblidhen firmat e nevojshme të deputetëve të PS-së për depozitimin e nismave në Kuvend. Sipas raportimeve, projektet do të duhet të qëndrojnë në Kuvend për dy javë përpara nisjes së shqyrtimit në komisionet parlamentare dhe më pas në seancë plenare.
Një tjetër çështje që pritet të trajtohet lidhet me dëmshpërblimin e bizneseve të prekura nga protestat. Sipas planit të bërë publik nga kryeministri, bizneset e vogla parashikohet të dëmshpërblehen në masën 100%, ndërsa bizneset e mëdha në masën 70%.
Lexo gjithashtu
Për këtë qëllim, qeveria pritet të miratojë një akt normativ, i cili më pas do t’i paraqitet Kuvendit për shqyrtim.
Masat e paralajmëruara vijnë pas protestave të fundit në Tiranë, të cilat janë shoqëruar me përplasje mes protestuesve dhe policisë, si dhe me dëmtime të pronës publike dhe private.
Për momentin, nuk është bërë e ditur nëse gjatë mbledhjes do të mblidhen të gjitha firmat e nevojshme për depozitimin e nismave ligjore.
