Protestuesit janë mbledhur sërish këtë të shtunë para Ministrisë së Arsimit në Tiranë, në ditën e pestë të tubimeve që kanë shoqëruar kryeqytetin me tensione dhe përplasje.
Gjatë protestës, një 20-vjeçar ka folur për mediat, duke renditur shqetësimet e tij për kushtet ekonomike, kostot e larta të jetesës dhe problemet që, sipas tij, hasin studentët në arsim. Ai u shpreh gjithashtu se dëshiron që deputeti demokrat Saimir Korreshi të zgjidhet kryeministër, pasi e konsideron si personin që mund të ndihmojë vendin.
Protestuesi tha se ka rreth 150 ditë që proteston për të drejtat e tij dhe pretendoi se gjatë tubimeve të fundit policia ka ushtruar dhunë ndaj pjesëmarrësve. I riu ngriti shqetësimin edhe për kostot e jetesës dhe vështirësitë financiare me të cilat, sipas tij, përballen studentët që punojnë për të financuar studimet.
“I kanë çuar qiratë nga 800 mijë lekë në muaj dhe rrogat tona nga 500 mijë lekë. Po rrimë nga 5-6 vetë nëpër shtëpi, sepse s’kemi çfarë bëjmë. Edhe punojmë, edhe studiojmë, sepse po nuk punuam, nuk studiojmë dot”, u shpreh protestuesi.
Protestuesi: Jam 20-vjeç. Kam 150 ditë që protestojmë për të drejtat tona. Ky nuk donte me të mirë, por donte kështu. U kthyem kështu, por kemi policinë kundra. Shikoni si janë këta me mburoja. Ne edhe këto maska i vëmë sepse na ngelin në shkolla. Këta me mburoja na gjejnë në tokë dhe na rrahin na zhdëpin në dru. I kanë çuar qiratë nga 800 mijë lekë në muaj dhe rrogat tona nga 500 mijë lekë. Po rrimë nga 5-6 vetë nëpër shtëpi, sepse s’kemi ça bëjmë. Edhe punojmë edhe studiojmë, sepse po nuk punuam, nuk studiojmë dot. Ne e bëjmë në privat. Ata na thonë ‘nuk mësoni, kapeni në shtet’. Po ça të bëjmë, nuk i kemi të gjithë mundësitë, sepse bursa morën vetëm çunat e deputetëve e ministrave. Ne s’i morëm dot. Këtu s’ka asgjë të saktë, çdo gjë është e prishur. Duke filluar nga pedagogët, që vijnë pijnë kafe dhe ikin që aty. Duam vetëm të iki Edi Rama. Dua me shpirt vetëm Saimir Korreshin. Vetëm ai na bën punë ne, po s’na bëri ai, s’na bën njeri tjetër punë ne. Vetëm ai se kush tjetër, do vij Arlind Qori, apo ai Llapi.
