Protesta e studentëve, Policia thirrje tubuesve: Ruani qetësinë dhe distancohuni nga personat që ushtrojnë dhunë

Policia e Shtetit u ka bërë thirrje pjesëmarrësve në protestë të ruajnë qetësinë, të shmangin aktet e dhunës dhe të distancohen nga personat e maskuar që, sipas policisë, po sulmojnë efektivët dhe po dëmtojnë pronën publike e private.

Në një apel publik, Policia e Shtetit thekson se e drejta për të protestuar garantohet nga Kushtetuta, ndërsa dhuna ndaj punonjësve të policisë, qytetarëve dhe institucioneve është e papranueshme dhe e dënueshme me ligj.

Protestuesit i ‘mbysin’ me gurë, policia u hedh me autobotë ujin me ngjyrë ‘blu’

Në deklaratën e saj, policia bën me dije se është në krye të detyrës për të garantuar sigurinë e qytetarëve, ushtrimin e së drejtës për tubim paqësor dhe mbrojtjen e jetës, pronës dhe institucioneve.

Autoritetet u kanë bërë thirrje protestuesve që të ndërpresin menjëherë aktet e dhunës, duke paralajmëruar se personat që kryejnë veprime të kundërligjshme do të mbajnë përgjegjësi penale.Policia e Shtetit deklaron se do të vijojë të veprojë me profesionalizëm dhe në përputhje me ligjin, me qëllim garantimin e rendit dhe sigurisë publike.

“E drejta për të protestuar mbrohet. Dhuna nuk tolerohet”, përfundon apeli i Policisë së Shtetit.

Njoftimi i plotë:

APEL I POLICISË SË SHTETIT

Policia e Shtetit u bën thirrje të gjithë pjesëmarrësve në tubim të ruajnë qetësinë, të shmangin çdo akt dhune dhe të distancohen nga personat e maskuar që po sulmojnë punonjësit e Policisë dhe po dëmtojnë pronën publike e private.

E drejta për të protestuar është e garantuar me Kushtetutë, por dhuna ndaj punonjësve të Policisë, qytetarëve dhe institucioneve është e papranueshme dhe e dënueshme me ligj.

Policia e Shtetit është në krye të detyrës për të garantuar sigurinë e çdo qytetari, ushtrimin e të drejtës së tubimit paqësor, mbrojtjen e jetës, pronës dhe institucioneve.

Apelojmë për ndërprerjen e menjëhershme të akteve të dhunës. Çdo person që kryen veprime të kundërligjshme do të mbajë përgjegjësi penale përpara ligjit.

Policia e Shtetit do të vijojë të veprojë me profesionalizëm, përmbajtje dhe vendosmëri, në përputhje me ligjin, për të garantuar rendin dhe sigurinë publike.

E drejta për të protestuar mbrohet. Dhuna nuk tolerohet.