Anëtarët e Partisë Demokratike në Fier dhe Korçë i janë drejtuar këtë të shtunë kutive të votimit për të zgjedhur drejtuesit e rinj të degëve lokale. Në të dyja qytetet garojnë gjithsej shtatë kandidatë.
Në Fier, për drejtimin e degës së PD-së garojnë Ardian Ferro, Enkelejda Veliu, Fatjon Semanjaku, Gentian Koçi dhe Festim Meta.
Sipas të dhënave të procesit, rreth 3 800 anëtarë kanë të drejtë vote. Numri i demokratëve në listat zgjedhore është reduktuar ndjeshëm pas rishikimit të tyre, pasi më herët në këtë degë rezultonin rreth 8 000 anëtarë.
Zgjedhjet në PD-në e Fierit nuk u zhvilluan në afatin e parashikuar nga statuti, ndryshe nga proceset në degët e tjera të vendit.
Edhe në Korçë ka nisur votimi për zgjedhjen e kryetarit të ri të degës së Partisë Demokratike. Në garë janë Harito Zoti dhe Mikel Dishnica.
Lexo gjithashtu
Sipas listës zyrtare, rreth 4 800 anëtarë kanë të drejtë vote dhe do të përcaktojnë përmes votës se kush do të drejtojë degën e PD-së në vijim.
Procesi zgjedhor pritet të vijojë gjatë gjithë ditës. Pas përfundimit të votimit dhe numërimit të votave, do të shpallen rezultatet në të dyja degët.
