Këshilli i Lartë i Gjyqësorit iu drejtua me një letër ditën e sotme Minsitrisë së Financave ku i kërkon që të ekzekutojë vendimin për rrogat e gjyqtarëve.
Përmes një letre KLGJ thekson se se situata ligjore dhe buxhetore lidhur me formulën e llogaritjes së pagave të gjyqtarëve rrodhi pas shfuqizimit të dispozitave ligjore nga Gjykata Kushtetuese me vendimin nr. 15, datë 17 shkurt 2026.
Pasi Kuvendi i Shqipërisë dështoi të miratonte ndryshimet e nevojshme ligjore brenda afatit të caktuar të datës 31 korrik 2026, KLGJ miratoi më 26 gusht vendimin nr. 435 për të unifikuar zbatimin e detyrimit kushtetues, duke marrë si referencë kategorinë e lartë drejtuese në administratë (Kategoria I, Klasa 1-2).
KLGJ i përgjigjet prerë pretendimeve të Ministrisë së Financave për verifikime administrative, duke bërë me dije se në disa gjykata, si në Durrës, Fier dhe Gjirokastër, urdhërshpenzimet e miratuara nga vetë degët e thesarit janë bllokuar më pas në bankat përkatëse. Organi i qeverisjes së sistemit gjyqësor nëvizon se as Kuvendi, as Qeveria dhe as Ministria e Financave nuk mund të pezullojnë apo të vënë në diskutim fuqinë detyruese të vendimeve të Gjykatës Kushtetuese, pasi një veprim i tillë cenon drejtpërdrejt nenin 132 të Kushtetutës dhe parimin e shtetit të së drejtës.
Lexo gjithashtu
Sipas KLGJ-së, mosveprimi i Kuvendit nuk mund të shndërrohet në një të drejtë të ekzekutivit për të pezulluar efektet e vendimit kushtetues apo për të cenuar garancinë e paprekshmërisë së pagës së gjyqtarëve. Në përmbyllje të letrës, KLGJ i kërkon zyrtarisht Ministrisë së Financave ekzekutimin e menjëhershëm të pagave të muajit gusht për të gjithë nëpunësit e administratës gjyqësore që nuk preken nga ky vendim, si dhe kalimin e pagave për magjistratët e të tria niveleve të gjykatave.
