Ish-futbollisti i njohur francez, Emmanuel Petit, ka reaguar me tone të ashpra pas akteve të dhunës dhe trazirave që përfshinë disa qytete të Francës gjatë protestave të 17 tetorit.
Kampioni i botës me Francën në vitin 1998 dhe fituesi i Kampionatit Europian në vitin 2000 ka dënuar shkatërrimet, grabitjet dhe sulmet e regjistruara gjatë përplasjeve. Sipas tij, disa persona kanë shfrytëzuar protestat për të kryer akte vandalizmi, duke e zhvendosur vëmendjen nga shqetësimet e qytetarëve për rritjen e kostos së jetesës.
Petit bëri gjithashtu deklarata të forta për integrimin dhe respektimin e vendit, duke dalluar ata që, sipas tij, duan të kontribuojnë në shoqërinë franceze nga personat që nuk respektojnë vendin ku jetojnë.
“Unë e dua vendin tim. Dua edhe të gjithë të huajt që e duan vendin tim dhe që dëshirojnë të integrohen. Por të gjithë të tjerët, duke nisur nga francezët që nuk duan që Franca të mbetet ajo që është, kthehuni nga keni ardhur. Nuk kemi nevojë për ju”, deklaroi ish-mesfushori.
Deklaratat e ish-kampionit francez vijnë në një klimë tensionesh sociale, ku protestat kundër kostos së lartë të jetesës janë shoqëruar edhe me episode dhune dhe dëmtime të pronës.
