Kreu i Bashkimit Demokratik për Integrim (BDI), Ali Ahmeti, ka reaguar lidhur me zhvillimet e fundit dhe protestat në Tiranë, duke bërë thirrje për maturi politike, dialog dhe përgjegjësi të përbashkët për tejkalimin e situatës.
Në mesazhin e tij, Ahmeti shprehet se Shqipëria po përballet me një moment delikat, që kërkon reflektim nga e gjithë klasa politike, duke lënë mënjanë interesat partiake në funksion të interesit të qytetarëve dhe stabilitetit të vendit.
Ai thekson se situata duhet të zgjidhet përmes dialogut dhe veprimeve të përgjegjshme, në mënyrë që të mos cenohet më tej besimi te institucionet, siguria e qytetarëve dhe funksionimi demokratik i shtetit.
“Shqipëria nuk është pronë e askujt, por atdheu i të gjithëve”, shprehet Ahmeti, duke nënvizuar se përgjegjësia për tejkalimin e krizës u takon të gjithë aktorëve politikë dhe shoqërorë.
Thirrje studentëve për protesta paqësore
Lexo gjithashtu
Në reagimin e tij, Ahmeti u drejtohet gjithashtu studentëve dhe protestuesve, duke i ftuar që kërkesat e tyre t’i shprehin me dinjitet dhe të mos lejojnë që tensionet apo përplasjet të largojnë vëmendjen nga mesazhi i protestës.
Ai dënon shkatërrimin e pronës, duke kujtuar se pas çdo biznesi qëndrojnë puna, mundi dhe sakrifica e njerëzve. Sipas tij, forca e një proteste qëndron te qartësia e kërkesave, këmbëngulja qytetare dhe respektimi i parimeve demokratike.
Nga ana tjetër, kreu i BDI-së nënvizon se institucionet shtetërore kanë përgjegjësinë të garantojnë rendin, sigurinë dhe dinjitetin e qytetarëve, duke vepruar me paanshmëri, profesionalizëm dhe respekt për të drejtat themelore.
Ahmeti thekson se asnjë formë dhune, pavarësisht se nga cila palë vjen, nuk mund të jetë zgjidhje për krizën, ndërsa përplasjet duhet t’ia lënë vendin komunikimit dhe dialogut.
“Kjo është koha për reflektim të gjerë”
Duke iu referuar aspiratës së Shqipërisë për anëtarësim në Bashkimin Europian, Ahmeti thekson rëndësinë e respektimit të demokracisë, sundimit të ligjit, institucioneve dhe të drejtave të qytetarëve.
Ai u bën thirrje drejtuesve politikë që të tregojnë përgjegjësi dhe të krijojnë ura komunikimi, duke vendosur interesin e vendit mbi ndasitë politike.
Në përfundim, Ahmeti apelon për bashkim dhe përgjegjësi mbarëkombëtare, duke theksuar se Shqipëria ka nevojë për zgjidhje konkrete që minimizojnë pasojat për qytetarët dhe institucionet.
“Le të mbizotërojnë dialogu mbi përplasjen dhe e ardhmja e Shqipërisë mbi çdo gjë tjetër”, është mesazhi përmbyllës i reagimit të tij.
