Kombëtarja shqiptare zbret sot në fushë përballë Bjellorusisë, në ndeshjen e vlefshme për Ligën e Kombeve. Kuqezinjtë synojnë kreun e grupit dhe promovimin direkt në Ligën B, në një përballje që nis në orën 18:00 dhe zhvillohet në Hungari, për shkak të kufizimeve të vendosura nga UEFA ndaj Bjellorusisë.
Të dyja përfaqësueset vijnë në këtë sfidë pas fitoreve 2-0 në ndeshjet e fundit, çka pritet ta bëjë edhe më të fortë përballjen e sotme.
Shqipëria do të ketë një mungesë të rëndësishme në mesfushë. Ylber Ramadani nuk do të jetë në dispozicion për shkak të pezullimit, pasi ka plotësuar numrin e kartonëve të verdhë. Në vend të tij pritet të luajë Juljan Shehu, ndërsa Qazim Laçi është një tjetër alternativë për këtë pozicion.
Nga ana tjetër, Bjellorusia rikthen në dispozicion sulmuesit Artem Shumansky dhe Herman Barkouski, të cilët kanë shlyer pezullimet. Megjithatë, skuadra kundërshtare do të jetë pa mesfushorin Aleksandr Svirepa, të skualifikuar, dhe mbrojtësin Vladislav Kalinin, që mungon për shkak dëmtimi.
Formacionet e mundshme
Lexo gjithashtu
Shqipëria (4-2-3-1): Berisha; Hysaj, Ismajli, Gjimshiti, Mitaj (Pilios); Asllani, Shehu (Laçi); Uzuni (Seferi), Muçi, Hoxha; Manaj.
Bjellorusia (4-2-3-1): Lapoukhov; Lukashov, Volkov, Gomanov, Pechenin; Selyava, Bocherov; Kontsevoy, Ebong, Gromyko; Simanenka (Barkouski ose Shumansky).
