Legjenda e Real Madridit, Raúl González Blanco, është trajneri i ri i Real Oviedos. Klubi spanjoll ka zyrtarizuar emërimin e 49-vjeçarit, i cili ka firmosur një kontratë deri në qershor të vitit 2028.
Raúl merr drejtimin e skuadrës pas shkarkimit të Julián Caleros, i cili u largua nga detyra pavarësisht fitores 2-1 ndaj Cádizit në kampionat. Drejtuesit e klubit vendosën të ndryshojnë trajner, duke ia besuar projektin një prej emrave më të njohur të futbollit spanjoll.
Për Raúlin, kjo është eksperienca e parë si trajner i një ekipi të parë në futbollin profesionist. Ai ka kaluar disa vite në strukturat e Real Madridit, ku drejtoi Real Madrid Castilla për gjashtë sezone dhe më parë fitoi UEFA Youth League me ekipin e të rinjve.
Si futbollist, Raúl ishte një nga ikonat e Real Madridit, me të cilin fitoi gjashtë tituj të La Ligës dhe tri Champions League. Pas largimit nga Madridi, ai luajti edhe për Schalke 04, Al-Sadd dhe New York Cosmos, përpara se të tërhiqej nga futbolli në vitin 2015.
Detyra e tij e parë me Oviedon do të jetë të shtunën, në përballjen ndaj Gironës. Skuadra renditet në vendin e nëntë në kampionat dhe synon të luftojë për rikthimin në elitën e futbollit spanjoll.
Lexo gjithashtu
Për Raúlin nis kështu një kapitull i ri në karrierën si trajner, me synimin për të dëshmuar se përvoja dhe emri i madh si futbollist mund të shndërrohen në sukses edhe në pankinë.
