Real Madridi po përgatitet për një sezon rekord edhe jashtë fushës së lojës. Klubi madrilen synon të arrijë të ardhura prej 1.405 miliardë eurosh, ndërsa shpenzimet për personelin dhe amortizimin e kontratave të futbollistëve kanë prekur shifrën rekord prej 707 milionë eurosh.
Sipas portalit të specializuar “2Playbook”, kjo është kostoja më e lartë e regjistruar ndonjëherë nga klubi spanjoll, duke e afruar atë me Paris Saint-Germain për nivelin e shpenzimeve.
Pavarësisht kostove të larta, drejtuesit e klubit, të udhëhequr nga Florentino Pérez, mbështeten te rritja e të ardhurave për të ruajtur ekuilibrin financiar. Një rol kryesor pritet të luajë stadiumi “Santiago Bernabéu”, nga i cili parashikohet të gjenerohen rreth 420 milionë euro përmes biletave, sponsorizimeve, ambienteve VIP dhe organizimit të eventeve të ndryshme.
Ndërkohë, shitja e disa futbollistëve, mes tyre Nico Paz, Víctor Muñoz dhe Gonzalo García, pritet të sjellë rreth 155 milionë euro të ardhura shtesë.
Me këto objektiva, Real Madridi synon të vendosë rekorde të reja financiare, duke ruajtur njëkohësisht shpenzimet e personelit në rreth 50% të të ardhurave të parashikuara.
