Një shpërthim i fuqishëm në një fabrikë hekuri dhe çeliku pranë qytetit të Izmirit, në Turqinë perëndimore ka sjellë humbjen e jetës për dhjetë persona, ndërsa 14 të tjerë kanë mbetur të plagosur.
Ngjarja e rëndë ndodhi të hënën, ndërsa bilanci i viktimave u rrit gradualisht gjatë operacionit të kërkim-shpëtimit, sipas autoriteteve vendase.
Ngjarja ndodhi mesditën e kësaj të hëne në fabrikën HABAŞ, në distriktin Aliağa. Shpërthimi u pasua nga një zjarr i madh, ndërsa në zonë u krijua një re e dendur tymi.
Sipas autoriteteve lokale, dyshohet se aksidenti ndodhi gjatë procesit të derdhjes së çelikut të lëngshëm, kur një vinç i montuar në tavan u shkëput dhe ra në furrën e harkut elektrik.
Si pasojë, numri i viktimave arriti në dhjetë. Operacionet e kërkim-shpëtimit u përqendruan në zonën e fabrikës, ndërsa autoritetet vijojnë të ndjekin situatën dhe të përcaktojnë rrethanat e shpërthimit.
Lexo gjithashtu
Dëshmitari okular Deniz Ulker, i cili po kalonte pranë fabrikës në momentin e shpërthimit, tha se gjithçka u ndje si një tërmet.
“U duk sikur toka po lëvizte poshtë këmbëve tona, mendova se ishte tërmet. Kur pashë fabrikën përtej rrugës, vura re se prej saj po dilte tym i zi dhe i dendur. Një zjarr kishte shpërthyer në zonën ku ndodhej oxhaku”, deklaroi Ulker për agjencinë shtetërore të lajmeve Anadolu.
