Ish-presidenti Ilir Meta, i cili prej më shumë se dy vitesh ndodhet në paraburgim me kërkesë të SPAK-ut, ka reaguar lidhur me progresraportin e Bashkimit Evropian për Shqipërinë, duke akuzuar qeverinë e Edi Ramës për korrupsion, kapje të institucioneve dhe mungesë përparimi në procesin e integrimit evropian.
Përmes një reagimi, Meta u ndal te fondet e parashikuara nga Plani i Rritjes së BE-së, duke iu referuar të dhënave të Kontrollit të Lartë të Shtetit (KLSH). Sipas Metës, nga 922 milionë eurot e parashikuara për Shqipërinë në kuadër të Planit të Rritjes së BE-së, deri në fund të vitit 2025 vendi kishte përfituar vetëm 76.2 milionë euro mbështetje buxhetore.
Meta iu referua edhe gjetjeve të progresraportit të Komisionit Evropian, duke përmendur korrupsionin sistemik, kapjen e institucioneve, mungesën e rezultateve në luftën kundër korrupsionit, problemet me pavarësinë e drejtësisë dhe presionin ndaj medias.
Në vijim të reagimit, ish-presidenti akuzoi kryeministrin Rama se po përpiqet t’i paraqesë vonesat dhe dështimet si arritje, përmes asaj që ai e cilësoi si propagandë dhe lobim të korruptuar.
Meta pretendoi se asnjë nga nëntë kushtet e Bundestagut gjerman të vitit 2019 nuk është përmbushur dhe se situata e krijuar ka ndikuar në largimin e një numri të madh shqiptarësh drejt vendeve të Bashkimit Evropian.
Lexo gjithashtu
Postimi i plotë:
Nuk ka Europë dhe Regres-Raport, që mbulon korrupsionin dhe kapjen totale të shtetit nga Edi Rama.
Nga 922 milionë euro të parashikuara nga Plani i Rritjes së BE-së, Shqipëria, sipas Kontrollit të Lartë të Shtetit, ka përfituar deri në fund të vitit 2025 vetëm 76.2 milionë euro mbështetje buxhetore.
Për 228.47 milionë eurot e destinuara për investime, disbursimi ishte ZERO sepse Edi Rama jo vetëm nuk ka përmbushur reformat por ka një administratë totalisht patronazhiste.
Edhe vetë Komisioni Europian evidenton korrupsionin sistemik, kapjen e institucioneve, mungesën e rezultateve në luftën kundër korrupsionit, problemet me pavarësinë e drejtësisë, presionin ndaj medias dhe degradimin e shtetit të së drejtës.
Edi Rama kërkon të integrojë Shqipërinë në Europë përmes lobimeve të korruptuara, paraqitjes së dështimeve si suksese, të zvarritjeve si arritje, dhe me të njëjtat mekanizma me të cilët ka kapur shtetin, korrupsionin, klientelizmin, propagandën dhe pandëshkueshmërinë!
Nuk ka Regres-Raport, që fsheh Narkoshtetin, që ka krijuar në zemër të Europës dhe që përbën një kërcënim, jo vetëm për sigurinë tonë kombëtare dhe rajonale, por edhe për vetë kontinentin.
Asnjë standard nuk është plotësuar nga 9 kushtet e Bundestagut të vitit 2019, asnjë standard nuk është përmirësuar.
Të keqpërdorësh luftën në Ukrainë dhe interesin strategjik të BE për të përshpejtuar zgjerimin nuk ndihmon njeri, sepse ngaqë nuk janë përmbushur ato 9 kushte të Bundestagut, mbi 800 mijë shqiptarë janë detyruar të jetojnë në Europë duke u larguar nga sytë-këmbët nga vendi i tyre.
Ndaj Lëvizja Studentore mund të jetë fuqia kryesore për të zhbllokuar integrimin europan dhe për t’u ndarë me shtetin e dështuar të Edi Ramës.
Askush nuk çuditet, që pengmarrësi kryesor i integrimit të Shqipërisë, që nga bllokimi me alibinë e Qarkut të Fierit, të vetëshpallet si i vetmi garant i këtij procesi.
Po kështu, të vetëshpallet edhe si njeriu që e ka çuar flamurin e Shqipërisë atje ku nuk ka qenë kurrë, dhe në fakt këtu ai nuk gënjen sepse është i vetmi që e ka çuar flamurin e Shqipërisë në ARUBA dhe këtë më mirë se çdo gjë e tregon rënia në pikiatë e kursit të euros nga narko-euro.
Europa nuk mund të jetë vetëm euro dhe për më tepër narko-euro për aq kohë sa Kriteret e Kopenhagenit nuk janë shfuqizuar ende.
