Kreu i Partisë Demokratike, Sali Berisha, ka reaguar për zhvillimet e fundit të protestës studentore, duke akuzuar kryeministrin Edi Rama për përpjekje për të përçarë lëvizjen e të rinjve që prej ditësh protestojnë kundër qeverisë.
Në një deklaratë të tij, Berisha pretendon se përpjekjet për të krijuar ndasi mes studentëve dhe mbështetësve të tyre kanë dështuar. Sipas tij, të rinjtë që janë ngritur në protestë nuk besojnë se kryeministri mund të ndryshojë, por kërkojnë largimin e tij nga pushteti.
“Pra, mund të themi se sot Edi Rama, me puthadorët e tij, dështoi në mënyrë përfundimtare të përçajë protestën”, deklaroi Berisha.
Ai u bëri thirrje qytetarëve, pavarësisht bindjeve politike dhe dallimeve mes tyre, që të mbështesin protestën studentore. Sipas kreut të opozitës, qëllimi kryesor duhet të jetë garantimi i zgjedhjeve të lira, në mënyrë që qytetarët të vendosin vetë për të ardhmen e vendit.
Berisha dënoi gjithashtu atë që e cilësoi si dhunë policore ndaj protestuesve dhe kërkoi lirimin e menjëhershëm të studentëve të ndaluar në komisariatet e policisë.
Lexo gjithashtu
Në fund të reagimit, ai iu drejtua edhe efektivëve të policisë, duke i ftuar të mos ushtrojnë dhunë ndaj të rinjve dhe të bashkohen me protestën. Sipas tij, kjo lëvizje nuk është vetëm në interes të studentëve, por edhe të qytetarëve të tjerë shqiptarë.
Deklaratat e Berishës vijnë në një kohë kur protesta e studentëve dhe të rinjve në Tiranë vijon të shoqërohet me tensione dhe përplasje me policinë.
