Breshëri armësh në mes të natës dhe një makinë e djegur vetëm dy kilometra larg.
Kjo është skema e një ngjarjeje të rëndë të ndodhur në fshatin Urakë të Matit, ku persona ende të paidentifikuar qëlluan me armë drejt një automjeti të parkuar pranë një banese në pronësi të bashkëshortes së Arben Lleshit.
Dyshohet se atentati ka qenë një mesazh kërcënues për Lleshin, i cili prej vitesh jeton jashtë vendit. Për fat të mirë, në automjet nuk ka pasur persona, ndërsa nga të shtënat janë shkaktuar vetëm dëme materiale.
Rreth dy kilometra larg vendit të ngjarjes, në aksin Burrel-Rrëshen, policia gjeti të përfshirë nga flakët një automjet tip Golf, i cili dyshohet se është përdorur nga autorët për kryerjen e atentatit dhe më pas është djegur për të zhdukur gjurmët.
Brenda tij, policia gjeti dy armë zjarri automatike, të cilat besohet se janë përdorur në sulmin me armë. Nga verifikimet e para ka rezultuar se Golf-i ishte raportuar i vjedhur në Elbasan.
Lexo gjithashtu
Pas ngjarjes, policia ka ngritur grupe kontrolli në akset nacionale, ndërsa hetuesit po kqyrin kamerat e sigurisë në banesat dhe bizneset e zonës, me shpresën për të rindërtuar lëvizjet e autorëve para dhe pas të shtënave.
Një nga pistat kryesore të hetimit lidhet me Arben Lleshin, i cili jeton në disa shteteve të Europës. Hetuesit po verifikojnë nëse sulmi ndaj automjetit të parkuar pranë banesës ka lidhje me të dhe nëse bëhet fjalë për një konflikt të mëparshëm.
