Argjentina dhe Brazili kanë publikuar listat e futbollistëve të grumbulluar për ndeshjet e radhës, por vëmendjen e kanë tërhequr dy mungesa të rëndësishme: Lionel Messi dhe Neymar.
Emrat e dy yjeve të futbollit botëror nuk figurojnë në listat e përfaqësueseve të tyre, duke rikthyer në vëmendje të ardhmen e tyre me fanellat kombëtare. Sipas informacionit të publikuar, të dy futbollistët kanë vendosur të mos jenë më pjesë e skuadrave përfaqësuese.
Messi dhe Neymar kanë qenë për shumë vite figurat kryesore të futbollit argjentinas dhe brazilian, duke lënë gjurmë të rëndësishme në historinë e kombëtareve të tyre. Kapiteni argjentinas arriti kulmin me triumfin në Kupën e Botës 2022 në Katar, ndërsa Neymar është një prej golashënuesve më të mirë të të gjitha kohërave për Brazilin.
Mungesa e tyre shënon një ndryshim të rëndësishëm për dy prej kombëtareve më të mëdha të futbollit botëror, të cilat tashmë duhet të shohin drejt një kapitulli të ri, pa dy prej yjeve që i kanë udhëhequr për vite me radhë.
