Debate të forta u zhvilluan sot në Komisionin e Posaçëm për Reformën Zgjedhore mes bashkëkryetarit të PS-së, Damian Gjiknurit, dhe deputetit të PD-së, Gent Strazimiri.
Diskutimi për sistemin zgjedhor, hapjen e listave dhe uljen e numrit të mandateve bën që deputeti demokrat Strazimiri të rikthejë në tryezën e debatit përgjimet e publikuara për zgjedhjet 10 vite më parë, ndërsa Gjiknuri i cilësuar komentet si personale.
Gjiknuri: Nuk thashë se ulja e numrit të deputetëve ka të bëjë me hapjen e listës, kemi mundësi të bëjmë. Është një sistem i bërë bashkërisht, nuk keni përse t’i ktheheni. Sistemi zgjedhor i vendos nga ju, nga ana jonë ka një kundër-ofertë. Nëse jeni për sistem proporcional kombëtar me listën e hapur, ejani të diskutojmë formulën për uljen e numrit të mandateve.
Strazimiri: Damian, sa herë vij në mbledhjen e komisionit, kam një siklet dhe them vete nëse përmendet litari në shtëpinë e të varurit. Të flasësh për zgjedhjet e lira dhe të ndershme kur je kapur duke thënë: Tërmet, tërmet. Pika, pika, pika nënën. Je kapur në flagrancë duke u trukuar zgjedhjet sot e 10 vite. Je kapur në kontekst penal
Gjiknuri: Metaforat po diskuton ti tani? Po e merr personale.
Strazimiri: Po personale po e marr, sepse ti po merr përsipër të kthesh përgjigjen. Ke qenë i akuzuar nga prokuroria, qartë se e mbyllët pastaj me influencat që keni ju.
Gjiknuri: Nuk kam qenë i pandehur.
Strazimiri: Nuk je marrë si i pandehur? Epo, kjo është situata në këtë vend. Vijmë këtu dhe duhet të flas me këtë individ që rri atje sikur po ha fara dielli. OSBE ka thënë se është hequr vija e demarkacionit në këtë vend. E gjithë administrata është kapur duke punuar për PS. Ka dhe kundër-ofertë ky tërmeti që i liron nënën zgjedhjeve.