Një burrë 94-vjeçar izraelit vdiq ditën e sotme pasi u rrëzua jashtë ndërtesës ku banonte në Ramat Gan, pak pasi ishte kthyer nga një qendër votimi, ku kishte këmbëngulur të votonte në zgjedhjet e Izraelit për Knessetin e 26-të.
Sipas mediave izraelite, i moshuari ishte i vendosur të ushtronte të drejtën e tij të votës, pavarësisht moshës. Vajza e tij, Shirley, e shoqëroi në qendrën e votimit, ku ai votoi për Gadi Eisenkot, një nga rivalët kryesorë të kryeministrit Benjamin Netanyahu.
Ajo tregoi për median Ynet se i ati kishte dëshiruar shumë të merrte pjesë në zgjedhje dhe nuk kishte ndërmend të hiqte dorë nga vendimi i tij.
Por, pas kthimit në shtëpi, 94-vjeçari doli nga makina, humbi papritur ndjenjat dhe ndërroi jetë në hyrje të banesës.
Pavarësisht dhimbjes për humbjen e të atit, Shirley u shpreh e lumtur që ai arriti të votonte. Ajo e cilësoi atë një shembull për të gjithë, duke theksuar rëndësinë e pjesëmarrjes në zgjedhje dhe ushtrimit të së drejtës demokratike të votës.
