Forcat e armatosura ukrainase kanë realizuar një operacion të pazakontë shpëtimi, duke përdorur një dron me gjashtë helika për të evakuuar një ushtar të plagosur nga një zonë e rrezikshme pranë vijës së frontit.
Sipas një deklarate të Njësisë së Sistemeve Tokësore pa Pilot të Brigadës së 92-të të Veçantë Sulmuese, ky është operacioni i parë i këtij lloji në botë për transportimin ajror të një ushtari të plagosur me një mjet ajror pa pilot.
Ushtari, pjesëtar i Brigadës së 30-të të Veçantë të Mekanizuar, ishte plagosur gjatë qëndrimit në pozicionin e tij luftarak. Evakuimi ishte veçanërisht i vështirë për shkak të pranisë së minave në terren dhe kërcënimit të vazhdueshëm nga dronët rusë.
Sipas ushtrisë ukrainase, përdorimi i mjeteve tokësore pa pilot nuk konsiderohej i sigurt, ndaj u vendos të provohej transportimi nga ajri, pa rrezikuar një ekuipazh njerëzor.
Për operacionin u përdor një heksapter i rëndë i prodhuar nga kompania ukrainase Gurzuf Defence, e cila ia ofroi mjetin ushtrisë pa pagesë. Droni ishte projektuar për transportimin e ngarkesave të rënda dhe për misione ushtarake, por nevojiteshin përshtatje teknike për të garantuar transportin e sigurt të një personi.
Lexo gjithashtu
Ekspertët e ushtrisë, në bashkëpunim me prodhuesin, kryen ndërhyrjet e nevojshme për të ruajtur stabilitetin e dronit gjatë fluturimit. Përpara misionit u zhvilluan teste, ndërsa operacioni u planifikua në bashkëpunim me disa njësi ushtarake për të kufizuar rreziqet.
Sipas deklaratës, droni u drejtua nga një operator ushtarak i Brigadës së 30-të të Mekanizuar dhe arriti ta nxirrte ushtarin e plagosur nga zona e rrezikshme. I lënduari u dërgua në spital dhe po i nënshtrohet rehabilitimit. Ushtria bëri të ditur se jeta e tij nuk është më në rrezik.
Në operacion morën pjesë pjesëtarë të brigadave të 92-të, 30-të dhe 14-të, Korpusit të 10-të të Ushtrisë, si dhe specialistë të kompanisë Gurzuf Defence. Autoritetet ukrainase nuk publikuan datën dhe vendndodhjen e saktë të misionit, për arsye të mundshme sigurie.
Operacioni tregon një përdorim të ri të dronëve në luftën në Ukrainë: përveç zbulimit, mbikëqyrjes, furnizimit dhe sulmeve, ato po testohen edhe për evakuimin e ushtarëve të plagosur nga zona ku ndërhyrja e ekipeve të shpëtimit është tepër e rrezikshme.
Ndërkohë, kompania ukrainase SkyFall ka zhvilluar dronin StarGate, i cili synon gjithashtu të përdoret për evakuimin ajror të ushtarëve të plagosur dhe i është dorëzuar ushtrisë për testime në kushte reale të frontit.
