Kreu i Shtëpisë së Bardhë, Donald Trump deklaroi së fundmi se Shtetet e Bashkuara po vlerësojnë me shumë kujdes situatën me Iranin, ndërsa paralajmëroi se shumë shpejt mund të ketë përgjigje.
Presidenti amerikan, duke folur nga Zyra Ovale, tha se administrata e tij po shqyrton me kujdes zhvillimet e fundit dhe mundësinë e përfshirjes së Iranit.
“Ka ardhur koha që Irani të arrijë një marrëveshje me Shtetet e Bashkuara, përndryshe “ndoshta do t’i shkatërrojmë”, deklaroi Trump, duke iu përgjigjur pyetjeve të gazetarëve për mënyrën se si Uashingtoni synon të arrijë një marrëveshje me Teheranin.
“Duhet të marrim atë vendim. Ose i shkatërrojmë, ose arrijmë një marrëveshje, por koha ka ardhur. Do të përfundojë shumë shpejt, në një mënyrë ose në tjetrën”, tha presidenti amerikan.
Lexo gjithashtu
Deklaratat e Trump vijnë në një moment kur tensionet mes Uashingtonit dhe Teheranit mbeten të larta.
Irani ka kundërshtuar kategorikisht akuzat dhe dyshimet për përfshirje në zhvillimet e fundit dhe incidentin në bazën amerikane në Britani. Ambasada iraniane në Londër i ka cilësuar ato si “spekulime të pabazuara dhe dashakeqëse”.
Edhe ministri i Jashtëm iranian, Abbas Araghchi, ka reaguar ndaj deklaratave, duke kundërshtuar publikisht dyshimet për përfshirjen e Iranit.
Teherani ka paralajmëruar gjithashtu se rezervon të drejtën për të ndërmarrë masa ligjore nëse është e nevojshme për të mbrojtur të drejtat dhe interesat e Iranit.
Ndërkohë, Trump e ka bërë të qartë se administrata amerikane po shqyrton të gjitha mundësitë dhe se një vendim për hapat e ardhshëm ndaj Iranit pritet shumë shpejt.
