Pas shpërndarjes së protestës në qendër të Tiranës, policia ka nisur ndalimin dhe shoqërimin e disa personave, pas përplasjeve të dhunshme mes protestuesve dhe forcave të rendit.
Përplasjet zgjatën rreth një orë, derisa efektivët arritën të largonin turmën nga bulevardi “Dëshmorët e Kombit”, duke përdorur gaz lotsjellës dhe ujë me presion. Protestuesit u shtynë përtej urës së Lanës, ndërsa situata u përshkallëzua më tej.
Pas shpërndarjes së turmës, forcat e policisë vijuan ndjekjen e grupeve të të rinjve përgjatë bulevardit dhe në zonën pranë Piramidës. Në këto zona kanë nisur ndërhyrjet për ndalimin dhe shoqërimin e personave të përfshirë në protestë.
Gjatë përplasjeve, disa protestues hodhën gurë në drejtim të efektivëve, ndërsa policia përdori dy automjete ujëhedhëse dhe gaz lotsjellës për të vënë situatën nën kontroll.
Deri më tani, nuk është bërë i ditur një bilanc zyrtar për numrin e personave të arrestuar apo të shoqëruar. Ndërkohë, situata në qendër të kryeqytetit vijon të mbetet e tensionuar.
