Arrestohen 14 persona dhe procedohen penalisht në gjendje të lirë 3 të tjerë, në lidhje me protestën e zhvilluar më 1 shtator pranë Kryeministrisë në Tiranë.
Sipas Policisë së Tiranës, grupi i protestuesve u grumbullua rreth orës 20:00 në rrugën “Ismail Qemali”, në anën jugore të Kryeministrisë, ku bllokuan hyrje-daljet e institucionit. Në atë kohë, në Kryeministri ndodheshin personalitete të larta shtetërore.
Policia vendosi një kordon sigurie për të penguar depërtimin e protestuesve brenda perimetrit të sigurisë. Për rreth 30 minuta, efektivët u kanë bërë thirrje protestuesve, përmes megafonit, që të shpërndaheshin dhe të lironin rrugën.
Sipas policisë, protestuesve iu bë e ditur se veprimet e tyre ishin në kundërshtim me ligjin, pasi pengonin qarkullimin e mjeteve dhe lëvizjen e lirë të personaliteteve shtetërore.
Pavarësisht thirrjeve, protestuesit vijuan qëndrimin në rrugë dhe, sipas uniformave blu, kundërshtuan me forcë punonjësit e policisë.
Lexo gjithashtu
Në momentin e zhvendosjes së tyre për lirimin e hyrje-daljeve të Kryeministrisë dhe të rrugës, disa prej protestuesve u ulën në rrugë dhe vijuan bllokimin, ndërsa dyshohet se goditën dhe shtynë efektivët.
Në përfundim të veprimeve policore, u arrestuan në flagrancë 14 persona, Dritan Goxhaj, Junik Matoshi, Edison Lika, Erlind Almeta, Sokol Bushi, Lulzim Gjini, Valtion Shameti, Florian Manarkolli, Desiderjo Alimucaj, Bora Mitrovica, Arvina Lleshi, Ylli Brahaj, Arben Kola dhe Aumiraldi Dalliu, ndërsa për tre të tjerë nisi procedimi penal në gjendje të lirë.
Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për veprat penale “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të policisë së rendit publik”, “Prishja e qetësisë publike” dhe “Pengimi i qarkullimit të mjeteve të transportit”.
Policia vijon veprimet procedurale për zbardhjen dhe dokumentimin e plotë të episodeve të ndodhura gjatë protestës.
