Një person ka mbetur i vrarë dhe pesë të tjerë janë plagosur nga të shtënat me armë zjarri në periferi të Parisit, në Francë. Ngjarja ndodhi në zonat e Trappes dhe La Verrière, ku një person qëlloi me armë nga një automjet në disa vende të ndryshme. Autoritetet franceze dyshojnë për një sulm me motive terroriste dhe raciste, ndërsa i dyshuari është arrestuar.
Sipas mediave të huaja shtënat zgjatën më pak se 15 minuta. Mes të plagosurve është edhe një vajzë 12-vjeçare, e cila u plagos rëndë. Tre prej të plagosurve ndodhen në gjendje shumë të rëndë.
Ministri i Brendshëm francez, e cilësoi ngjarjen si një “krim terrorist”, ndërsa Prokuroria Kombëtare Kundër Terrorizmit ka marrë përsipër hetimet për të përcaktuar motivet e sulmit.
