Ish-ministrja e Jashtme dhe e Mbrojtjes dhe deputetja socialiste Olta Xhaçka, është marrë zyrtarisht nën hetim nga Prokuroria e Posaçme (SPAK) për dy vepra penale: korrupsion dhe pastrim të produkteve të veprës penale.
Vetëm dy ditë më parë, Xhaçka u paraqit në ambientet e SPAK-ut. Përpara saj, në Prokurorinë e Posaçme ishte paraqitur edhe bashkëshorti i saj, Artan Gaçi, i cili po hetohet gjithashtu në kuadër të së njëjtës çështje.
Sipas burimeve të raportuara, prokurorët Ols Dado dhe Altin Dumani kanë mbledhur prova që lidhen me Xhaçkën dhe Gaçin për dyshimet për këto vepra penale. Hetimi lidhet me një dosje të ardhur përmes letërporosive nga vende të Bashkimit Europian.
Dyshimet lidhen me korrupsion në raport me persona të tretë dhe me pastrim parash përmes kompanisë së Artan Gaçit, i njohur si investitor strategjik. Në kuadër të hetimeve, prokurorët kanë sekuestruar dokumente, kanë siguruar të dhëna bankare dhe kanë marrë në pyetje persona të tretë.
Hetimet vijojnë për të dokumentuar rrethanat e çështjes dhe për të përcaktuar përgjegjësitë e mundshme. Marrja nën hetim nuk përbën shpallje fajësie dhe dyshimet ndaj personave të përfshirë mbeten objekt i procesit hetimor.
