Policia e Tiranës ka arrestuar 11 persona, mes tyre dy të mitur, dhe ka proceduar penalisht në gjendje të lirë 7 të tjerë, në vijim të veprimeve hetimore për incidentet e regjistruara gjatë protestës së zhvilluar dje në kryeqytet.
Po ashtu është arrestuar edhe E. K., 33 vjeç, i cili dyshohet se, gjatë tubimit të zhvilluar tri ditë më parë, ka dëmtuar me sende të forta ambientet e Komisariatit të Policisë nr. 3.
Sipas Policisë, gjatë protestës persona të dyshuar kanë sulmuar punonjësit e policisë dhe godinën e komisariatit me lëndë piroteknike, gurë dhe bomba molotov, duke shkaktuar zjarr dhe dëmtime materiale. Si pasojë e incidenteve, janë dëmtuar 10 punonjës policie.
Njoftimi i Policisë:
Në vijim të veprimeve hetimore dhe procedurale, të kryera nga shërbimet e Drejtorisë Vendore të Policisë Tiranë, në lidhje me veprimet e kundërligjshme të kryera gjatë tubimit të zhvilluar dje:
Lexo gjithashtu
– u arrestuan në flagrancë shtetasit E. P., 29 vjeç, G. K., 24 vjeç, F. B., 19 vjeç, E. B., 23 vjeç, S. D., 52 vjeç, E. B., 27 vjeç, A. D., 23 vjeç, L. Z., 18 vjeç dhe E. B., 20 vjeç, si dhe dy shtetas të mitur;
– u proceduan në gjendje të lirë 7 shtetas.
Ndërkohë, në vijim të veprimeve të kryera nga specialistët për Hetimin e Krimeve në Komisariatin e Policisë Nr. 3, për identifikimin dhe kapjen e personave që sulmuan punonjësit e Policisë dhe godinën e Komisariatit të Policisë Nr. 3 me lëndë piroteknike, gurë e bomba molotov, duke shkaktuar zjarr dhe dëmtime në godinën e Komisariatit, si dhe duke dëmtuar 10 punonjës policie, u identifikua dhe u ndalua shtetasi E. K., 33 vjeç, i cili dyshohet se gjatë tubimit, tri ditë më parë, ka dëmtuar me sende të forta ambientet e këtij komisariati.
Materialet procedurale iu referuan Prokurorisë, për veprime të mëtejshme, për veprat penale “Shkatërrimi i pronës”, “Shkatërrimi i pronës me zjarr”, “Goditjet për shkak të detyrës”, “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të Policisë të rendit publik”, “Prishja e qetësisë publike”, “Mosbindja ndaj urdhrit të punonjësit të policisë së rendit publik”, “Shkelja e rregullave mbi lëndët plasëse, djegëse dhe radioaktive”, “Pengimi i qarkullimit të mjeteve”, “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi, mbajtja, blerja apo shitja pa leje e armëve të ftohta”.
