Ish- ministri i Mbrojtjes Pirro Vengu ka reaguar për zhvillimet e fundit në Shqipëri, duke vënë theksin te nevoja për rivendosjen e rendit, forcimin e institucioneve dhe vlerësimin e punonjësve që shërbejnë në sektorët kyç të shtetit.
Përmes një mesazhi, Vengu ka theksuar se pavarësia e një kombi lidhet me aftësinë për të vendosur për të ardhmen e tij dhe për të mbrojtur atë që ndërton. Sipas tij, kjo kërkon institucione të forta dhe njerëz të përkushtuar në përmbushjen e detyrave të tyre.
“Ndaj duhet rivendosur rendi. Rendi në rrugë, por edhe rendi i vlerave dhe i përgjegjësive: çfarë çmojmë, kujt i besojmë dhe cilin zgjedhim të shpërblejmë”, shprehet Vengu.
Vengu ka nënvizuar gjithashtu rëndësinë e dialogut demokratik, duke theksuar se ai mund të sjellë ndryshime kur vlerat dhe përgjegjësitë marrin vendin e duhur në shoqëri.
Në mesazhin e tij, ai është ndalur edhe te rritja e pagave dhe shpërblimeve për punonjësit e Policisë së Shtetit, duke e lidhur këtë politikë me vlerësimin e përgjegjësisë që ata mbajnë.
Lexo gjithashtu
Sipas tij, arsimtarët, ushtarakët, punonjësit e policisë, mjekët, infermierët dhe zjarrfikësit duhet të jenë në krye të piramidës së pagave në administratën shtetërore, për shkak të rolit dhe përgjegjësive që kanë në shoqëri.
“Kujdestarët e brezave dhe të parakushteve për një të ardhme më të mirë për të gjithë duhet të jenë në krye: në vlerësim, në shembull dhe në shpërblim”, përfundon mesazhi i Vengut.
Reagimi vjen në një klimë tensionesh politike dhe protestash në vend, ndërsa deklarata e Vengut vë në fokus rendin publik, përgjegjësinë institucionale dhe vlerësimin e punonjësve të shërbimit publik.
REAGIMI I PLOTË
Një Komb është i pavarur për aq sa ka forcën të vendosë për fatin e vet dhe të mbrojë atë që ndërton. Kjo forcë kërkon institucione që qëndrojnë në këmbë dhe njerëz që dinë, munden dhe guxojnë të përmbushin detyrën.
Ndaj duhet rivendosur rendi. Rendi në rrugë, por edhe rendi i vlerave dhe i përgjegjësive: çfarë çmojmë, kujt i besojmë dhe cilin zgjedhim të shpërblejmë. Kur vlerat dhe përgjegjësitë vendosen në rendin që u takon, dialogu demokratik mund të nisë dhe të sjellë ndryshim. Ky është edhe thelbi i rritjes së pagave dhe shpërblimeve për Policinë e Shtetit.
Arsimtarët, ushtarakët e policët, mjekët e infermierët dhe zjarrfikësit duhet të jenë në krye të piramidës së pagave në administratën shtetërore. Për përgjegjësinë që mbajnë dhe për shembullin që një shoqëri zgjedh t’u japë fëmijëve të saj.
Kujdestarët e brezave dhe të parakushteve për një të ardhme më të mirë për të gjithë duhet të jenë në krye: në vlerësim, në shembull dhe në shpërblim.
