Kryetari i Partisë Demokratike, Sali Berisha, deklaroi se mbledhja e kryesisë së PD-së zhvillohet në prag të protestës kombëtare kundër qeverisë së Edi Ramës, të cilën e cilësoi si “narkodiktaturë”.
Në fjalën e tij, Berisha akuzoi kryeministrin se ka humbur logjikën dhe arsyen, ndërsa paralajmërimet e tij ndaj protestuesve i cilësoi si kërcënime. Sipas kreut të PD-së, Rama po ndryshon qëndrimin nga thirrjet për dialog te paralajmërimet për masa ndëshkuese ndaj pjesëmarrësve në protesta.
Berisha iu referua deklaratave të kryeministrit për identifikimin e personave që kryejnë akte dhune, krijimin e një regjistri të veçantë dhe përgjegjësinë e familjeve të të miturve që dëmtojnë pronën publike apo private.
Ai pretendoi se paralajmërimet për kufizime dhe detyrime financiare ndaj protestuesve synojnë të ndikojnë te pjesëmarrja në protesta.
“Bankat janë biznese, të cilat nuk funksionojnë sipas parimeve të një narkodiktatori, por funksionojnë sipas ligjeve kombëtare dhe ndërkombëtare të sektorit bankar financiar”, deklaroi Berisha, duke iu referuar takimit të Ramës me përfaqësues të sektorit bankar.
Lexo gjithashtu
Kreu i PD-së kritikoi gjithashtu paralajmërimet për dëmshpërblimin e dëmeve të shkaktuara gjatë protestave, duke akuzuar kryeministrin për hipokrizi. Në këtë kontekst, ai ngriti akuza lidhur me pasurinë e Ramës, çështjen e inceneratorëve, portin e Durrësit dhe projektet e infrastrukturës.
Berisha: Thirrëm këtë mbledhje kryesie në prag të protestës kombëtare kundër narkodiktaturës dhe narkoregjimit.
Edi Rama nga paniku i tmerrshëm që e ka ngërthyer, frika e madhe se dita e llogarisë po vjen, ka humbur logjikën, arsyen dhe është lëshuar në kërcënime bajate, vulgare që faktojnë të gjithë arketipin e tij psikologjik, genet e paraardhësve të tij prej xhelatësh dhe vazhdon kërcënime nga më të ndryshmet ndaj protestuesve.
Në mëngjes i fton për dialog.
Pasi ia përmbysin karriget, del tani me fjalim tjetër me bankierët dhe mendon se fuqia monetare e bankave do mund ta kthejë kundër protestës.
Bankat janë biznese, të cilat nuk funksionojnë sipas parimeve të një narkodiktatori, por funksionojnë sipas ligjeve kombëtare dhe ndërkombëtare të sektorit bankar financiar.
Sot ai kërcënoi protestuesit për blacklistime, për linçime, për heqje pasaportash udhëtimi, për bllokimi të transportit publik.
I nxjerr të gjitha nga arkiva e etërve të tij.
Kërcënon se do u bëjë ngarkim zhdëmtimin.
Shikoni të dashur qytetarë se çfarë hipokrizie, çfarë pretendon ky?
Ky njeri flet për dëme në një kohë kur ka ndërtuar me paratë e baballarëve të atyre që protestojnë sarajet me themele më të gjata se vila e Enverit, se diktatori ideologjik që kishim.
Ka rrethuar sarajet e tij me një park që nuk e ka as pallati mbretëror.
Ka paguar, ky që flet për dëme dhe taksa, ka paguar një litër naftë për metër katror sepse ka vendosur të ulë vetë çmimet pesë herë që mund të paguante ai.
Ky flet për dëme, ka fytyrë të flasë për dëme ky njeri që ka zhdukur 130 milionë euro në djegësin e Tiranës.
Që ka zhdukur në total 200 milionë euro me tre djegësat, asnjëri prej tyre nuk punon.
Ka fytyrë ky të flasë për zhdëmtime që ka lënë vendin pa porte për herë të parë në historinë e tij. Që portin e Durrësit e plaçkiti me Alabarin e tij për të ndërtuar Dubain e 1001 netëve.
Ka fytyrë ky të flasë për dëmtimet që ka ndërtuar rrugët me çmime 8 deri 10 herë më të larta.
Që ka ndërtuar shkolla 8 deri 10 herë më të larta se standardi i BE.
Ka moral ky të përmendë dëmtime? Njeriu që është akuzuar se ka transportuar me qindra valixhe diplomatike para të vjedhura dhe refuzon kontrollin parlamentar.
Ka fytyrë të flasë për dëme ky që do t’i plaçkisë aeroportin e Vlorës kompanive private vetëm se kontrata ka 130 milionë euro bileta të munguara, të firmosura prej tij.
A ka hipokrizi të shkallës më të lartë se kjo, më thoni mua?
A mund të flasë ky për dëmtime në një kohë kur me narkoshtetin e tij i ka bërë gjëmën Shqipërisë dhe shqiptarëve.
Me narkoshtetin e tij që ndërtoi, vendosi në Shqipëri regjimin pushtues më shkatërrimtar.
A mund të flasë ky për dëme në një kohë kur me narkoeurot ka vrarë me mijëra ndërmarrje eksporti. Ka ulur prodhimin industrial me 15.3 përqind. Ka ulur në katër vite eksportet e vendit me 28 përqind.
A mund të flasë për dëme ky që me vjedhjet e tij, kartelet e drogës dhe narkoshtetin ka përzënë nga Shqipëria në 10 vite, 1 milion e 99 mijë shqiptarë vetëm në hapësirën e Shengenit.
A mund të krahasojë ky veten me Makronin, me Melonin apo të tjerët, cili prej tyre ka të regjistruara akte të tilla?
Ky duhet të lajë gojën kur të përmendë emrat e tyre.
