Kryetari i Kuvendit, Niko Peleshi, ka vendosur të shtyjë me një javë zhvillimin e seancës plenare, në një kohë kur vendi po përballet me tensione dhe episode dhune gjatë protestave.
Përmes një reagimi, Peleshi u ka bërë apel forcave politike dhe qytetarëve që të tregojnë vetëpërmbajtje dhe të zgjedhin dialogun përballë situatës së krijuar. Ai ka vënë theksin te nevoja për reflektim dhe ruajtjen e rendit publik, në mënyrë që tensionet të mos përshkallëzohen më tej.
Një shqetësim të veçantë, kreu i Kuvendit ka shprehur për përfshirjen e të rinjve dhe të miturve në akte dhune. Sipas tij, të rinjtë duhet të mbrohen nga klima e urrejtjes dhe përplasjet, duke shmangur përfshirjen e tyre në situata që mund të rrezikojnë sigurinë e tyre dhe të të tjerëve.
