Kryetari i Kuvendit, Niko Peleshi, ka reaguar lidhur me zhvillimet gjatë protestave në Shqipëri, duke ripublikuar qëndrimin e Komisionit Europian, i cili dënon aktet e dhunës, zjarrvëniet dhe sulmet ndaj institucioneve, si dhe dëmtimin e pronës publike e private.
Përmes një postimi në rrjetet sociale, Peleshi thekson se aktet e dhunshme nuk përfaqësojnë të drejtën e studentëve për të protestuar dhe nuk duhet të ngatërrohen me kërkesat e tyre për më shumë të drejta dhe mundësi.
Kreu i Kuvendit nënvizon se të rinjtë kanë të drejtë të ngrenë zërin për shqetësimet e tyre dhe të kërkojnë një të ardhme me mundësi të barabarta me bashkëmoshatarët e tyre në Bashkimin Europian.
Megjithatë, sipas Peleshit, dhuna nuk mund të jetë zgjidhje, ndërsa përballja me problematikat kërkon komunikim dhe dialog mes palëve.
Ai u bën thirrje qytetarëve që të ulen në tryezën e bisedimeve pa paragjykime dhe armiqësi, duke theksuar se sa më shumë të zgjasë situata, aq më i vështirë mund të bëhet dialogu.
Lexo gjithashtu
“Dhuna nuk ka vend në demokraci!”, shkruan Peleshi, duke kërkuar që palët të dëgjojnë njëra-tjetrën edhe kur nuk ndajnë të njëjtin qëndrim.
Në përfundim të reagimit, kryetari i Kuvendit apelon për bashkim dhe mirëkuptim, duke theksuar se pavarësisht dallimeve, qëllimi i përbashkët duhet të jetë e ardhmja e Shqipërisë.
Reagimi i Niko Peleshit:
DHUNA NUK KA VEND NË DEMOKRACI!
Komisioni Europian dënon qartë zjarrvëniet, sulmet ndaj institucioneve dhe shkatërrimin e pronës publike e private gjatë protestave në Shqipëri.
Sulmet ndaj institucioneve, djegia dhe shkatërrimi i pronës nuk kanë të bëjnë as me studentët, as me të drejtën e tyre për të protestuar.
Të rinjtë janë e sotmja dhe e nesërmja e Shqipërisë. Ata kanë të drejtë të kërkojnë me zë të lartë më shumë të drejta, më shumë mundësi. Kanë të drejtë të ëndërrojnë një të ardhme të barabartë me moshatarët e BE-së.
Por dhuna nuk është rruga.
Le të ulemi me njëri-tjetrin. Pa paragjykim, pa mllef. Çdo orë që kalon e bën më të vështirë dialogun.
Mbase mund të mos bihet dakord, por duhet folur. Duhet dëgjuar.
T’i japim dorën njëri-tjetrit SOT!
Jemi për një qëllim.
Për Shqipërinë.
