Një ngjarje tragjike ka tronditur një familje shqiptare në Itali, ku një 20-vjeçar ka humbur jetën pas një aksidenti të rëndë rrugor të ndodhur në orët e para të mëngjesit të djeshëm.
Viktima është identifikuar si Thomas Qirjaj, i cili do të mbushte 21 vjeç në muajin dhjetor.
Sipas raportimeve të mediave italiane, i riu po udhëtonte së bashku me katër miq të tij me një automjet tip “Volvo”, me targa zvicerane, në drejtim të Milanos. Pak pasi kaluan pikën e pagesës së autostradës, drejtuesi i makinës humbi kontrollin dhe automjeti u përplas me barrierën ndarëse.
Pas aksidentit, Thomas zbriti nga makina për të vendosur trekëndëshin e emergjencës, por në atë moment u përplas nga një automjet tip SUV, që drejtohej nga një 25-vjeçar nga Modena.
Sipas rindërtimit paraprak të ngjarjes, drejtuesi i SUV-it nuk arriti ta dallonte të riun në kohë dhe përplasja rezultoi fatale.
Lexo gjithashtu
Ekipet e emergjencës mbërritën menjëherë në vendngjarje dhe 20-vjeçari u transportua me urgjencë në spital, në gjendje kritike. Megjithatë, pavarësisht ndërhyrjes së mjekëve, ai nuk mundi t’u mbijetonte plagëve të marra.
Ndërkohë, katër miqtë që udhëtonin me të nuk pësuan dëmtime të rënda.
Humbja e Thomasit është një goditje e rëndë për familjen e tij shqiptare, e cila prej vitesh jeton në Caorso të Italisë. I riu ishte fëmija i vetëm i familjes, duke e bërë edhe më të dhimbshme këtë tragjedi.
