Katër gjimnazistë të shkollës së mesme “Naim Frashëri” në Durrës janë shoqëruar nga policia malazeze në qytetin e Kotorit, pas një incidenti të ndodhur gjatë një ekskursioni turistik në Malin e Zi.
Nxënësit, të gjithë djem, kanë kaluar natën në ambientet e policisë, ndërsa më pas janë lënë të lirë.
Sipas informacioneve paraprake, incidenti ka ndodhur ditën e djeshme, teksa grupi i nxënësve po kthehej nga dreka. Ata janë përfshirë në një konflikt me një grua të moshuar vendase, e cila i kishte pyetur se nga vinin.
Në përgjigje të pyetjes, gjimnazistët kanë formuar simbolin e shqiponjës me duar dhe kanë qeshur. Në atë moment, e moshuara ka goditur me shpullë njërin prej nxënësve, duke bërë që situata të përshkallëzohej.
Më pas, gruaja ka njoftuar policinë, duke pretenduar se ishte provokuar nga gjimnazistët. Pas ndërhyrjes së autoriteteve, katër nxënësit janë shoqëruar në polici, ku kanë kaluar orët e natës.
Lexo gjithashtu
Pranë tyre ka qenë edhe një mësuese shoqëruese, e cila ka shkuar në polici për t’u gjendur pranë nxënësve.
Pas lirimit, gjimnazistëve u është kërkuar të mos përsërisin më gjeste të tilla me simbolet kombëtare.
Për incidentin janë vënë në dijeni Drejtoria Rajonale e Arsimit Parauniversitar (DRAP) Durrës dhe Ministria e Arsimit.
