Kreu i grupit parlamentar të Partisë Demokratike, Gazment Bardhi, ka kërkuar identifikimin dhe arrestimin e menjëhershëm të personit përgjegjës për plagosjen e të riut Erjon Vishkulli gjatë protestës në Tiranë.
Përmes një reagimi publik, Bardhi bëri të ditur se Vishkulli i është nënshtruar një ndërhyrjeje kirurgjikale në syrin e majtë, me synimin për t’i shpëtuar shikimin, pas dëmtimit të pësuar nga një mjet i dyshuar si plumb gome.
Ai i ka bërë thirrje Prokurorisë së Tiranës që të veprojë pa vonesë për të zbardhur ngjarjen, duke identifikuar si autorin e dyshuar, ashtu edhe personat që mund të kenë dhënë urdhra, nëse rezulton se ka pasur të tillë.
Sipas Bardhit, asnjë rrethanë nuk mund të justifikojë dhunën ndaj një të riu që po merrte pjesë në protestë. Ai theksoi se personat përgjegjës duhet të përballen me drejtësinë, në përputhje me ligjin.
Në reagimin e tij, kreu i grupit parlamentar të PD-së bëri të ditur gjithashtu se Erjon Vishkulli është tifoz ultras i Kombëtares shqiptare dhe i ekipit të Elbasanit.
Lexo gjithashtu
Në përfundim, Bardhi shprehu solidaritetin me të riun dhe familjen e tij, duke uruar rikuperimin e plotë të shëndetit dhe duke kërkuar zbardhjen e plotë të ngjarjes.
