Një ngjarje e rëndë ka ndodhur pasditen e kësaj të premteje në fshatin Livoç, në Gjilan të Kosovës ku një burrë dhe një grua janë qëlluar me armë zjarri. Paraprakisht dyshohet se burri ka vrarë gruan dhe mikun e tij, në rrethana të paqarta. Ndërsa raportohet se i plagosur ka mbetur dhe një person.
Në lidhje me ngjarjen e rëndë ka reaguar dhe vetë Policia e Kosovës e cila konfirmon se viktimat janë një person i gjinisë mashkullore, rreth 30-vjeçar, i cili është gjetur brenda një veture dhe një femër rreth 30-vjeçare, e cila dyshohet se po ashtu është vrarë nga arma e zjarrit nga i njëjti i dyshuar.
Po ashtu bëhet me dije se i plagosur ka mbetur dhe një person i cili pas marrjes së ndihmës së parë në Emergjencën e Spitalit të Përgjithshëm në Gjilan, është transferuar në Qendrën Klinike Universitare të Kosovës (QKUK), për trajtim të mëtejshëm mjekësor.
Ndërsa bëhet me dije se autori i ngjarjes është vetëdorëzuar dhe efektivët kanë sekuestruar armën e përdorur në krimin e dyfishtë.
Dyshimet e para janë se ngjarja ka ndodhur pas kërkesës për divorc nga ana e gruas.
