Ngjarja e rëndë është regjistruar në Devoll, ku 82-vjeçarja është gjetur pa shenja jete pranë një rezervuari në afërsi të Bilishtit.
Sipas informacioneve paraprake, dyshohet se e moshuara është mbytur, ndërsa rrethanat e plota të ngjarjes mbeten ende të paqarta. Ajo që e bën edhe më të dhimbshme ngjarjen është fakti se trupin e pajetë të nënës e ka gjetur djali i saj i vogël, me të cilin ajo jetonte kohët e fundit.
Burime për mediat bëjnë me dije se 82-vjeçarja kishte pasur prej kohësh probleme me sklerozën. Gjithashtu, vitet e fundit ajo kishte kaluar një periudhë të vështirë psikologjike, pasi kishte humbur bashkëshortin dhe dy djemtë e saj.
Autoritetet vendase po punojnë për të zbardhur rrethanat e ngjarjes. Pritet që në vijim të dalin detaje të tjera që do të ndihmojnë në sqarimin e plotë të rastit.
