Një ekzekutim me injeksion vdekjeprurës në shtetin amerikan të Tenesit ka marrë një zhvillim të pazakontë, pasi e dënuara me vdekje, Christa Pike, vijoi të kishte rrahje zemre edhe pasi iu injektuan dy doza të ilaçit të përdorur për ekzekutimin.
Pike, 50 vjeçe, u transportua në spital pas ndërprerjes së procedurës, ndërsa avokatët e saj kërkuan ndërhyrje urgjente për ndalimin e ekzekutimit.
Sipas ekipit të saj ligjor, gruaja kishte humbur ndjenjat, por zemra e saj vazhdonte të rrihte dhe ajo mund të dëgjohej duke marrë frymë.Avokatët thanë se gjatë procedurës iu administruan dy shiringa me pentobarbital, por ekzekutimi nuk pati rezultatin e parashikuar.
Një prej tyre i deklaroi BBC-së se Pike po merrte trajtim në spital, në përpjekje për t’i shpëtuar jetën.Christa Pike u dënua me vdekje në vitin 1996, pasi u shpall fajtore për vrasjen e 19-vjeçares Colleen Slemmer.
Në kohën e krimit, Pike ishte 18 vjeçe. Sipas të dhënave të çështjes, ajo dhe i dashuri i saj në atë periudhë, Tadaryl Shipp, sulmuan dhe torturuan Slemmer përpara se ta vrisnin.
Lexo gjithashtu
Viktima dhe autorët ishin njohur në një kamp trajnimi për të rinj me probleme. Ngjarja ndodhi në vitet ’90 dhe çështja përfundoi me dënimin kapital të Pike.
Nëna e Colleen Slemmer, May Martinez, kishte shprehur më herët dëshirën që dënimi me vdekje të zbatohej. Në një deklaratë për Associated Press, ajo tha se kujtimi i ngjarjes e rikthen vazhdimisht te momentet e fundit të jetës së vajzës së saj dhe përpjekjet që ajo kishte bërë për t’u shpëtuar autorëve.
