Statistikat mbi shëndetin mendor në Gjermani po nxjerrin në pah një problem serioz, me më shumë se 100 mijë persona që, sipas vlerësimeve, tentojnë vetëvrasjen çdo vit.
Të dhënat e cituara nga Programi Kombëtar i Parandalimit të Vetëvrasjeve dhe Fondacioni për Mbështetjen e Depresionit tregojnë për një numër të konsiderueshëm personash që përballen me kriza të rënda psikologjike dhe kanë nevojë për mbështetje.
Pas gati katër dekadash me një prirje të përgjithshme në rënie, në vitin 2022 kjo tendencë u ndërpre dhe numri i rasteve nisi të rritet sërish.
Në vitin 1981, Gjermania regjistroi 18,825 vetëvrasje, ndërsa deri në vitin 2021 kjo shifër kishte rënë në 9,215 raste. Megjithatë, vitet e fundit janë shënuar rritje të njëpasnjëshme, duke rikthyer vëmendjen te nevoja për politika më të forta të parandalimit dhe mbështetjes psikologjike.
Vetëvrasjet përbëjnë rreth 1.1 për qind të të gjitha shkaqeve të vdekjes në Gjermani, sipas statistikave të përmendura në raportim.
Lexo gjithashtu
Ekspertët e shëndetit mendor theksojnë rëndësinë e identifikimit në kohë të shenjave të krizës psikologjike, ofrimit të ndihmës profesionale dhe krijimit të një mjedisi ku personat që përballen me vështirësi emocionale të mos ndihen të vetëm.
