Një aksident i rëndë hekurudhor është regjistruar të dielën në Egjipt, ku dy trena pasagjerësh janë përplasur rreth 76 kilometra në jug të Kajros. Si pasojë, të paktën katër persona kanë humbur jetën dhe 88 të tjerë janë plagosur.
Bilanci i viktimave dhe të plagosurve është bërë i ditur nga Ministria egjiptiane e Shëndetësisë.
Sipas Autoritetit Shtetëror Hekurudhor, një tren që udhëtonte nga Giza drejt Fayoumit u përplas me një tjetër tren që po udhëtonte nga Kajro drejt Asuanit. Përplasja shkaktoi daljen nga shinat të disa vagonëve.
Presidenti i Egjiptit, Abdel Fattah al-Sisi, urdhëroi zhvillimin e një hetimi të shpejtë për zbardhjen e rrethanave të aksidentit. Ai deklaroi se çdo person ndaj të cilit konstatohet neglizhencë duhet të mbajë përgjegjësi.
Ndërkohë, ekipet e emergjencës kanë nisur punën për pastrimin e rrënojave dhe rikthimin e qarkullimit në linjën hekurudhore Kajro–Egjipti i Sipërm.
