Presidenti amerikan Donald Trump ka reaguar ashpër ndaj rezultateve të zgjedhjeve të mesmandatit, duke pretenduar se ato përbëjnë një hap pas për Shtetet e Bashkuara.
Në një postim në platformën Truth Social, Trump iu referua rënies së tregjeve financiare, duke përmendur humbje prej rreth 3 trilionë dollarësh brenda një dite. Ai shprehu gjithashtu bindjen se ekonomia amerikane do të rimëkëmbet.
“Amerika bëri një hap të madh prapa në histori me rezultatet e zgjedhjeve të fundit”, shkroi presidenti, duke shprehur pakënaqësinë e tij për rezultatin e votimeve.
Në të njëjtin postim, Trump e lidhi rënien e Wall Street-it me fitoren e demokratëve në zgjedhjet e 3 nëntorit.
“Edhe tregu i bursave, i cili në kohën time po ngrihej si një raketë, regjistroi humbje prej 3 trilionë dollarësh vetëm në një ditë”, shkroi ai.
Lexo gjithashtu
Presidenti u përpoq gjithashtu të qetësonte investitorët, duke shprehur besimin se tregjet do të rikuperohen.
“Por mos kini frikë. Ne do të kthehemi më të mëdhenj dhe më të fortë se kurrë!”, përfundoi Trump.
Megjithatë, raportimet për rënien e tregjeve kanë përmendur edhe shqetësimet e investitorëve lidhur me sektorin e inteligjencës artificiale dhe rezultatet e kompanive të teknologjisë. Për këtë arsye, lidhja e drejtpërdrejtë mes rezultatit zgjedhor dhe humbjeve financiare mbetet një pretendim i Trump, jo një shkak i vetëm i konfirmuar.
