Mbi 300 tonë mbetje të rrezikshme të prodhuara nga Uzina e Ferrokromit, në pronësi të kompanisë koncesionare Albchrome, janë sekuestruar nga Prokuroria e Elbasanit. Bëhet fjalë për pluhurin e grumbulluar nga sistemi i filtrimit të uzinës, të cilin Agjencia Kombëtare e Mjedisit (AKM) e ka klasifikuar si shumë të rrezikshëm për shkak të përbërjes së tij.
Mbetjet janë sekuestruar në cilësinë e provës materiale në kuadër të një hetimi penal, ndërsa kompania Albchrome është ngarkuar me detyrimin për t’i ruajtur deri në një urdhër të mëtejshëm nga organi procedues.
Skandali u zbulua në 28 maj kur Inspektoriati Kombëtar i Mbrojtjes së Territorit pezulloi aktivitetin e Albchrome pasi evidentoi 318 tonë mbetje të rrezikshme të cilat depozitoheshin pa asnjë kusht sigurie.
Për këtë sasi mbetjesh kompania nuk dispononte asnjë kontratë transferimi për evadimin, asgjësimin apo përpunimin e tyre. Më tej ishte AKM ajo që pak ditë më parë i cilësoi këto mbetje si shumë të rrezikshme.
