Sofra e gurtë, e vendosur prej më shumë se dy javësh përpara godinës së Kryeministrisë, është kthyer në një pikë ku qytetarët ndalojnë për të bërë fotografi, por edhe për t’u ulur e për të pushuar.
Ka qenë kryeministri Edi Rama ai që ka publikuar disa pamje nga kjo hapësirë në llogarinë e tij në Facebook, duke i shoqëruar me një përshëndetje të shkurtër: “Mirëmëngjes”.
Postimi vjen në një kohë kur protestat studentore vijojnë në kryeqytet. Rama ka shprehur gatishmërinë e qeverisë për të shqyrtuar propozimet e studentëve dhe për t’iu përgjigjur shqetësimeve të tyre.
Megjithatë, deri më tani, kjo ftesë për dialog nuk është pranuar nga protestuesit, të cilët vijojnë të këmbëngulin në plotësimin e kërkesave të tyre.
Një ditë më parë, kreu i qeverisë prezantoi edhe një kanal të ri komunikimi online, të titulluar “Fol me kryeministrin”. Platforma synon t’u japë qytetarëve mundësinë të përcjellin pyetje, kritika, shqetësime dhe propozime konkrete, të cilat mund të merren në konsideratë në procesin e vendimmarrjes.
Lexo gjithashtu
Fillimisht, komunikimi përmes kësaj platforme do t’u ofrohet studentëve, por nisma nuk do të kufizohet vetëm te kryeministri. Qytetarët do të kenë mundësi të komunikojnë edhe me anëtarë të tjerë të qeverisë dhe të grupit parlamentar të Partisë Socialiste.
