Trajneri i Kosovës, Franco Foda, ka bërë publike listën e futbollistëve të grumbulluar për ndeshjet e nëntorit në UEFA Nations League. Në listë spikasin afrimet e reja, Enis Rexhepi dhe Bleon Kurtulus, ndërsa mungon kapiteni Amir Rrahmani, pas përplasjes së bërë publike me drejtuesit e Federatës së Futbollit të Kosovës (FFK).
Vëmendjen më të madhe e kanë marrë prurjet e reja, veçanërisht futbollistët e rinj me origjinë shqiptare që kanë zgjedhur të përfaqësojnë Kosovën. Mes tyre spikat Enis Rexhepi, talenti që aktivizohet te VfB Stuttgart dhe që ka qenë protagonist me paraqitjet e tij në UEFA Youth League. Pas zhvillimeve të fundit, ai i bashkohet përfaqësueses së Kosovës, duke mos zgjedhur mundësinë për të luajtur me Shqipërinë.
Një tjetër emër i ri në listë është Bleon Kurtulus, qendërmbrojtësi i lindur në vitin 2007, pjesë e Malmö FF, i cili më parë ka qenë pjesë e strukturave të moshave të Suedisë. Në grumbullim është edhe Lindrit Kamberi, kapiteni i FC Zürich, që pritet t’i japë trajnerit më shumë alternativa në repartin defensiv.
Mungesa e Amir Rrahmanit
Përtej prurjeve të reja, vëmendjen e tërheq edhe mungesa e Amir Rrahmanit. Kapiteni i Kosovës nuk figuron në listën e publikuar nga Foda, në një kohë kur marrëdhëniet e tij me drejtuesit e FFK-së janë shoqëruar me tensione.
Lexo gjithashtu
Rrahmani i kishte komunikuar trajnerit se nuk dëshironte të vazhdonte të luante për përfaqësuesen për sa kohë federata drejtohet nga drejtuesit aktualë. Ai kishte shprehur pakënaqësi për mënyrën e menaxhimit të institucionit, duke ngritur pikëpyetje mbi të ardhmen e tij me fanellën e Kosovës.
Nga ana tjetër, Foda është përpjekur të ulë tensionet, duke theksuar se situata është ekzagjeruar në diskutimet publike dhe duke u përqendruar te vazhdimësia e projektit sportiv. Megjithatë, mungesa e një prej futbollistëve kryesorë të repartit defensiv mbetet një nga çështjet që shoqërojnë publikimin e listës.
Emrat e grumbulluar nga Franco Foda
Në portë janë Arjanet Muric, Amir Sajpi dhe Visar Bekaj. Në mbrojtje spikasin Lumbarhd Dellova, Ilir Krasniqi, Kreshnik Hajrizi, Ron Raçi, Mërgim Vojvoda dhe Milot Avdyli.
Në mesfushë dhe në repartin ofensiv janë përfshirë Ermal Krasniqi, Veldin Hoxha, Erblin Osmani, Dion Kacuri, Lindon Emërllahu, Leon Avdullahu, Elvis Rexhbeçaj, Baton Zabërgja, Edon Zhegrova, Milot Rashica, Valmir Matoshi, Albion Rrahmani, Fisnik Asllani, Enis Rexhepi dhe Vedat Muriqi.
Lista ndërthur futbollistë me përvojë ndërkombëtare dhe emra të rinj, me të cilët Foda synon të përgatisë Kosovën për ndeshjet e nëntorit. Ndërkohë, çështja e Amir Rrahmanit mbetet një nga temat që shoqërojnë zhvillimet rreth përfaqësueses.
