Një urdhër ekzekutiv i nënshkruar nga Donald Trump në vitin 2018 gjatë presidencës së parë parashikon një mekanizëm me dy faza për të hetuar dhe vlerësuar ndërhyrjet e mundshme të huaja në zgjedhjet amerikane. Bëhet fjalë për Urdhrin Ekzekutiv 13848, të datës 12 shtator 2018, i cili parashikon përgjegjësi konkrete për Inteligjencën Kombëtare, Departamentin e Drejtësisë dhe Departamentin e Sigurisë Kombëtare.
Dokumenti ka marrë sërish rëndësi në prag të zgjedhjeve afatmesme amerikane të 3 nëntorit 2026, ndërsa më 31 gusht të këtij viti, Trump nënshkroi një njoftim për vazhdimin edhe me një vit të gjendjes së emergjencës kombëtare lidhur me kërcënimin e ndërhyrjeve të huaja në zgjedhjet amerikane.
Sipas mekanizmit të përcaktuar në urdhër, procesi i vlerësimit zhvillohet në dy faza.
Faza e parë – 45 ditë pas zgjedhjeve
Drejtori i Inteligjencës Kombëtare (DNI), në bashkëpunim me institucionet përkatëse, duhet të vlerësojë informacionet mbi ndërhyrjet e mundshme nga qeveri të huaja ose persona që veprojnë në emër të tyre. Raporti duhet të identifikojë natyrën e ndërhyrjes, metodat e përdorura, personat e përfshirë dhe shtetet që mund ta kenë autorizuar ose mbështetur atë.
Lexo gjithashtu
Nëse llogaritja nis nga përfundimi i zgjedhjeve të 3 nëntorit 2026, afati 45-ditor përfundon më 18 dhjetor.
Faza e dytë – 45 ditë të tjera
Pas marrjes së raportit të parë, Prokurori i Përgjithshëm dhe Sekretari i Sigurisë Kombëtare kanë 45 ditë të tjera për të vlerësuar ndikimin e mundshëm të ndërhyrjeve të huaja.
Shqyrtimi përfshin sigurinë dhe integritetin e infrastrukturës zgjedhore, numërimin e votave, transmetimin e rezultateve, si dhe sistemet e organizatave politike, fushatave dhe kandidatëve.
Nëse raporti i parë dorëzohet më 18 dhjetor, edhe faza e dytë do të përfundojë rreth 1 shkurtit 2027.
