Çështja civile që përfshin Bill Gates në Holandë, avokati i arrestuar në 2025 del nga mbikëqyrja elektronike

Një çështje gjyqësore që prej vitit 2023 po zhvillohet në Holandë, ku mes të paditurve janë bashkëthemeluesi i Microsoft, Bill Gates, drejtuesi i Pfizer, Albert Bourla, ish-kryeministri holandez Mark Rutte dhe disa persona të tjerë.

Padia është ngritur nga shtatë qytetarë holandezë, të cilët pretendojnë se janë mashtruar lidhur me sigurinë dhe efektivitetin e vaksinave kundër COVID-19. Ata kërkojnë që gjykata të konstatojë përgjegjësinë e të paditurve dhe të shqyrtojë pretendimet e tyre për dëmet e pretenduara. Të paditurit i kanë kundërshtuar akuzat.

Çështja u shqyrtua në një seancë publike më 22 tetor 2026, në gjykatën e Leeuwarden, ku palët paraqitën qëndrimet e tyre përpara një trupi gjykues prej tre gjyqtarësh. Sipas dokumentacionit të publikuar për procesin, vendimi pritet të shpallet në periudhën nga 9 dhjetori 2026 deri në fund të shkurtit 2027.

Çfarë ndodhi me avokatin Arno van Kessel?

Në qendër të vëmendjes është edhe avokati holandez Arno van Kessel, i cili ishte përfshirë në nisjen e procesit gjyqësor. Ai u arrestua më 11 qershor 2025, në kuadër të një hetimi të veçantë penal, ku dyshohet për përfshirje në një organizatë kriminale me karakter terrorist.

Sipas raportimit të medias holandeze “De Andere Krant”, Van Kessel kaloi më shumë se tetë muaj në paraburgim, ndërsa më pas u la në pritje të procesit penal nën masa mbikëqyrjeje, përfshirë vendosjen e një byzylyku elektronik.

Më 21 tetor 2026, një ditë përpara seancës së çështjes civile ndaj Gates dhe të tjerëve, gjykata vendosi t’i hiqte masën e mbikëqyrjes elektronike. Sipas avokatit të tij mbrojtës, Chris-Jan Kamminga, Van Kessel tashmë mund të udhëtojë edhe drejt Austrisë, ku pritet të qëndrojë gjatë kohës që pret nisjen e procesit penal.

Megjithatë, heqja e byzylykut elektronik nuk nënkupton mbylljen e hetimit apo shfajësimin e tij. Sipas të njëjtit raportim, Van Kessel vijon të jetë i dyshuar në çështjen penale të njohur si “Barracuda”.

Sakaq duhet theksuar seprocesi ndaj Bill Gates në Holandë është një padi civile dhe jo një procedim penal. Pra, Gates nuk është shpallur fajtor dhe nuk është marrë ndonjë vendim gjyqësor që të vërtetojë pretendimet e paditësve.

Gjykata kishte pranuar juridiksionin për të shqyrtuar padinë civile, pa vendosur mbi vërtetësinë e pretendimeve.

Tashmë, pas seancës së 22 tetorit 2026, palët presin vendimin e gjykatës holandeze, ndërsa hetimi penal ndaj avokatit Arno van Kessel mbetet një çështje më vete.