Kreu i Partisë Demokratike, Sali Berisha, u ka bërë thirrje qytetarëve shqiptarë që t’i bashkohen protestës së nesërme në mbështetje të studentëve, duke e cilësuar suksesin e revoltës së tyre si një fitore për të gjithë shoqërinë shqiptare.
Përmes një mesazhi publik, Berisha u kërkoi qytetarëve, pavarësisht moshës dhe bindjeve politike, të marrin pjesë në tubim dhe të mbështesin kërkesat e studentëve.
Në deklaratën e tij, kreu i PD-së përdori tone të ashpra ndaj kryeministrit Edi Rama dhe qeverisë, duke e akuzuar këtë të fundit për korrupsion dhe keqqeverisje.
Ai vlerësoi qëndrueshmërinë dhe vendosmërinë e studentëve gjatë protestave, duke theksuar se ata meritojnë mbështetjen e qytetarëve. Në përfundim, Berisha përsëriti thirrjen për mobilizim në protestën e nesërme, duke e lidhur pjesëmarrjen e qytetarëve me mbështetjen ndaj kërkesave të studentëve.
Berisha bën thirrje: Së pari, një thirrje miqësore për çdo qytetar shqiptar, të bashkohemi nesër në protestën më të fuqishme në mbështetje të revoltës studentore kundër Padrinos së Shqipërisë, kreut të organizatës kriminale, narkodiktaturës që ka vendosur ai.
Suksesi i revoltës studentore është sukses i çdo qytetari shqiptar që e do këtë vend.
Është sukses i shqiptarëve të të gjitha moshave dhe bindjeve që duan të ndërtojnë jetën në Shqipëri.
Është sukses për kombin shqiptar, i cili po e boshatis këtë vend ndër më të pasurit në Evropë dhe në botë.
Është sukses i shpresës dhe të ardhmes së shqiptarëve.
Ndaj dhe thirrja ime është: të gjithë me studentët, të gjithë për studentët, për suksesin e revoltës së tyre.
Studentët kanë dëshmuar kulmet e guximit të shqiptarëve.
Studentët kanë habitur shqiptarët dhe botën me trimërinë, sakrificat, vendosmërinë e tyre.
Ata meritojnë çdo mbështetje.
Të gjithë në Tiranë, të gjithë me studentët!
