Trajneri i Kombëtares shqiptare, Rolando Maran, do të publikojë nesër, të premten, në orën 12:00 listën e futbollistëve të grumbulluar për dy ndeshjet e fundit të fazës së grupeve të UEFA Nations League, ndaj Finlandës dhe Bjellorusisë.
Fillimisht, lista ishte planifikuar të bëhej publike të shtunën, më 7 nëntor, në orën 11:00, por Federata Shqiptare e Futbollit ka njoftuar ndryshimin e programit. Maran do të dalë përpara mediave në një konferencë për shtyp që do të zhvillohet në ambientet e “Shtëpisë së Futbollit”, ku pritet të flasë edhe për zgjedhjet e tij dhe dy sfidat e radhës.
Grumbullimi i kuqezinjve do të nisë zyrtarisht të hënën, më 9 nëntor, kur skuadra do të fillojë përgatitjet për dy takimet që do të përcaktojnë renditjen përfundimtare në grupin C1.
Shqipëria do të luajë fillimisht ndaj Finlandës, më 12 nëntor, në stadiumin “Air Albania”, në orën 20:45. Tri ditë më vonë, më 15 nëntor, kuqezinjtë do të përballen me Bjellorusinë në transfertë, në stadiumin “Illovszky Rudolf” në Budapest, duke nisur nga ora 18:00.
Aktualisht, Shqipëria kryeson grupin C1 me 9 pikë, ndërsa Bjellorusia dhe Finlanda ndajnë vendin pasues me nga 7 pikë secila. Për këtë arsye, dy ndeshjet e nëntorit janë vendimtare për kuqezinjtë në garën për ta mbyllur grupin në krye.
Lexo gjithashtu
Vëmendja tashmë është te lista e Maranit, ku priten të mësohen emrat e futbollistëve që do të synojnë t’i japin Shqipërisë rezultatet e nevojshme në dy përballjet e fundit të këtij edicioni të Ligës së Kombeve.
