Protesta në Tiranë, Ministria e Shëndetësisë: 40 të lënduar në Spitalin e Traumës

Të paktën 40 persona të lënduar janë paraqitur në Spitalin Universitar të Traumës mbrëmjen e së enjtes, në ditën e tretë të protestës në Tiranë. Sipas Ministrisë së Shëndetësisë, mes të lënduarve janë 14 protestues, përfshirë katër të mitur, si dhe 26 efektivë të Policisë.

Ministrja e Shëndetësisë dhe Mirëqenies Sociale, Klodiana Spahiu, ka vizituar të lënduarit në spital dhe është informuar nga ekipi mjekësor për gjendjen e tyre shëndetësore.

Sipas njoftimit të ministrisë, një efektiv policie i është nënshtruar një ndërhyrjeje kirurgjikale të suksesshme dhe do të vijojë trajtimin nën kujdesin intensiv. Ndërkohë, protestuesja E.P. paraqitet me parametra shëndetësorë të qëndrueshëm dhe po monitorohet nga ekipi mjekësor.

Nga 14 protestuesit e trajtuar, katër janë të mitur, të cilët kanë marrë kujdesin e nevojshëm mjekësor në prani të një psikologu klinik. Sa u përket efektivëve të Policisë, ministria bën me dije se nga 26 të paraqitur në Spitalin e Traumës, dy vijojnë të qëndrojnë të shtruar.

Në përfundim të njoftimit, Ministria e Shëndetësisë thekson se Spitali Universitar i Traumës vijon të ofrojë kujdes mjekësor për të gjithë personat e lënduar gjatë protestës.

Njoftimi i Ministrisë së Shëndetësisë:

“Ministrja e Shëndetësisë dhe Mirëqenies Sociale, Klodiana Spahiu, vizitoi pak minuta më parë të lënduarit gjatë protestës së sotme, të cilët po marrin trajtim në Spitalin Universitar të Traumës.

Ministrja u informua mbi gjendjen e tyre shëndetësore, përfshirë atë të efektivit të Policisë, i cili i është nënshtruar një ndërhyrjeje kirurgjikale të suksesshme dhe do të vijojë trajtimin nën kujdesin intensiv.

Ndërsa protestuesja E.P. paraqitet aktualisht në parametra shëndetësorë të qëndrueshëm dhe po ndiqet në dinamikë nga ekipi mjekësor.

Gjatë protestës së sotme, në Spitalin Universitar të Traumës janë paraqitur gjithsej 40 persona të lënduar, të cilët kanë marrë kujdesin e nevojshëm mjekësor.

Ekipi mjekësor multidisiplinor ka trajtuar 14 protestues. Katër të mitur kanë marrë trajtimin e nevojshëm në prani të psikologut klinik.

Nga 26 efektivët e Policisë të paraqitur dhe trajtuar në SUT, dy prej tyre vijojnë të qëndrojnë në spital.

Spitali Universitar i Traumës vijon të jetë i angazhuar për garantimin e kujdesit shëndetësor për çdo person të lënduar, me profesionalizëm dhe përkushtim.

SUT mbetet në krye të detyrës, në shërbim të çdo qytetari.