Një 36-vjeçar në Napoli është denoncuar për mashtrim, pasi dyshohet se i shiti një turisti gjerman një qese me kripë kuzhine, duke ia paraqitur si kokainë. Për “dozën” e rreme, turisti pagoi 40 euro.
Ngjarja u zbulua gjatë një operacioni të karabinierëve në zonën e sheshit Bellini, në qendrën historike të Napolit, një nga zonat më të frekuentuara të jetës së natës.
Efektivët, të cilët po patrullonin me rroba civile për të mos rënë në sy, vunë re 36-vjeçarin teksa i dorëzonte turistit një qese me pluhur të bardhë dhe merrte paratë në këmbim.
Pas ndërhyrjes së tyre, substanca iu nënshtrua një testi për identifikimin e lëndëve narkotike. Rezultati zbuloi se bëhej fjalë për klorur natriumi, pra kripë e zakonshme kuzhine, dhe jo për kokainë.
Mashtrimi i kushtoi turistit gjerman 40 euro, ndërsa e njëjta shumë do t’i mjaftonte për të blerë dhjetëra kilogramë kripë në supermarket.
Lexo gjithashtu
Pas zbulimit, ndaj 36-vjeçarit u bë kallëzim për mashtrim.
Gjatë të njëjtit operacion, karabinierët ndëshkuan me gjoba edhe katër persona të tjerë për konsum të lëndëve narkotike. Kontrollet u shtrinë gjithashtu në disa biznese të zonës, ku katër subjekte u gjobitën për shkelje të konstatuara.
Një tentativë për të shitur drogë që përfundoi me një produkt të zakonshëm kuzhine dhe një faturë prej 40 eurosh për turistin.
